Phil-Asia bodybuilding ipahigayon sa Sugbo

Kapin sa 100 ka mga langyawng bodybuilders mosalmot

MGA langyawng bodybuilder ang gipaabot nga modagsa dinhi sa Sugbo aron pagsalmot sa 5th PhilippineAsia 2016 International Bodybuilding and Fitness Championships nga ipahigayon karong Septiyembre 30 ngadto sa Oktubre 1 diha sa Summit Circle Ballroom sa Fuente Osmena, dakbayan sa Sugbo.

Kompirmadong mosalmot sa maong event nga giorganisar sa Workout Fitness Center mao ang 18 gikan sa Morroco, 16 gikan sa New Zeland, 10 sa India, upat sa Malaysia, tulo sa Hong Kong ug duha ka United Arab Emirates.

Si Dennis Delgado, ang chief organizer, nagkanayon nga ubayubay pa unya ang entries nga nagagikan sa laing nasod ang moparehistro sa dili pa moabot ang deadline.

Katapusang pagpanawat og registrants gikatakda karong Septiyembre 30. Ning maong adlaw, sa alas kwatro sa hapon, ipahigayon usab ang pre-judging ug nianang pagkagabii adunay welcome dinner party sa mga officials ug sa mga participants.

Ang mga kategoriya nga pagatigian sa maong kompetisyon mao ang masters (50 years above), Mr. Novice (Open class), Juniors (23 years under), Men’s bodybuilding (short, medium, tall) ug women’s open.

Gawas sa bodybuilding competition, adunay contest sa Ms. Figure (open class), Ms. Bikini (open class), Ms. Bikini (Shape), Ms. Fitness ug Mr. Physique (board short).

Subay niini, adunay seminar sa International Fitness Professionals Association (IFPA) nga himuon sa Oktubre 2 diha sa Capitol Central and Suite.

Ang CEO ug founder sa IFPA nga si Dr. Jim Bll maoy guest speaker sa maong seminar. Ang registration fee nagkantidad og P1,000.

Adunay IFPA certificates nga ipangapodapod ngadto sa tanang mga partisipante.