Tabal maoy moduslit sa urna sa 2016 Milo Little Olympics
ANG Sugboanong Olympian nga si Mary Joy Tabal maoy modala sa sulo sa 2016 Milo Little Olympics Regional Finals nga mosugod karong Septiyembre 8 sa Cebu City Sports Center.
Ang numero unong marathoner sa nasod ang modugkat sa urna alang sa kalinaw ug kahiusahan uban ni Samantha Limos, ang bronze medalist sa 6th Children of Asia International Games sa Russia sa niaging Hulyo.
Tapuson ang tulo ka adlaw nga kompetisyon sa Septiyembre 11 ug duwaon kini sa nagkalainlaing dapit sa Sugbo.
Sa niaging tuig, ang maong kalihukan didto duwaa sa Ilo-ilo City apan gibalik kini karong tuiga dinhi sa Sugbo alang sa ika-21 nga edisyon.
Si Ricky Ballesteros, ang organizer, mibutyag nga 80 porsiyento na silang andam alang sa maong kompetisyon nga pagatigaan sa mga atleta sa elementarya ug segundaryang eskuwelahan. Ila na usab nga gisuhid ang mga dapit pagatigian.
Sa CCSC ipahigayon ang swimming, athletics, sepak takraw ug football samtang adto sa Citi Green Tennis Court ug Alta Vista lawn tennis.
Sa Sacred Heart School Ateneo de Cebu (SHS-AdC) campus sa Mandaue City ang basketball ug secondary volleyball ug sa karaan campus sa SHS-AdC sa Gen. Maxilom Ave. ang volleyball sa elementary.
Ang ubang events arnis, chess, gymnastics, karatedo, scrabble, table tennis ug taekwondo—adto duwaon sa SM Seaside sa South Road Properties.
Dugang ni Ballesteros nga sagad sa out-of-town schools nagagikan sa Bohol, Dumaguete, Iloilo, Aklan, Leyte, ug uban pa.
Kadaghanan usab sa mga Cebu private schools ang mipadala og mga entries ug ingon man mga public schools.
“We have University of San Carlos, University of Visayas, Abellana National School, SHS-AdC. Most of the private schools have already registered, except University of Cebu (UC),” matod ni Ballesteros.
Sa sayo pa si UC athletic director Bernard Ricablanca nagkanayon nga naghuwat pa sila og approval gikan sa mga kadagkuan sa ilang eskuwelahan sa ilang pagsalmot.