3 PATAY SA SUNOG
Mga sakop sa banay nga Ouano nanga-trap sulod sa ilang balay
NAGGAKOS. Giyayungan sa mga bombero ang mga lawas sa inahan ug anak nga sila si Ma. Lyn Ouano-King, 50, ug 16 anyos niyang anak nga si May Crislyn. Lakip sa namatay sa sunog kagahapon sa buntag mao si Mario Ouano, 60, maguwang ni Ma. Lyn. Estorya sa
TULO ang patay ug usa ang nagrabihan human sa sunog nga miigo sa pipila ka balay sa may dalan SB Cabahug, Brgy. Ibabao Estancia, dakbayan sa Mandaue kagahapon sa buntag.
Atol ning pagsuwat, padayon pang gitino sa kabomberohan ang hinungdan sa sunog nga nagsugod sa balay ni Aida Ouano, 61, kinsa nakaangkon og 2nd ug 3rd degree nga paso.
Patay sa insidente ang tulo ka mga kabanay ni Ouano nga sila si Nestor Ouano, 60; Ma Lyn O. King, 50, ug iyang anak nga si May Crislyn O. King, 16.
Matod ni SFO2 Cipriano Codilla sa Bureau of Fire Protection (BFP) nga duha ka anggulo karon ang ilang gitanaw nga hinungdan sa sunog.
Una mao ang kalit nga pagkaguba sa air conditioner ug ang ikaduha mao ang pagluto ni Aida sayo sa buntag.
“Nagluto man ni siya kay magluto mani siya og sayo,” ni Codilla kinsa nagkanayon nga base sa pagumangkon ug silingan ni Aida, namaligya kini og sudan sa usa ka tunghaan.
Sumala pa ni Codilla nga ila pa unyang hinabion si Aida kinsa anaa sa kritikal nga kondisyon human naangol sa hitabo.
“Siyara gyuy makasulti sa matuod nga nahitabo kay basin nibuto to ang iyang gilutuan, maong napaso siya,” sigun pa ni Codilla.
Di mominos sa P100, 000 ang danyos sa sunog nga giisa sa ikaduhang alarma pasado ala 5 sa buntag.
Lima ka mga balay ang nangaugdaw sa maong hitabo kay ginama kini sa light materials samtang duha ang partially burned, dugang ni Codilla.
Duda niya nga ang sunog posibleng nagsugod sa ubos nga bahin sa duha ka andanang balay ni Aida ug usa kini mikuyanap pataas ug sa mga silingan niini.
Nakontrolar ang kayo sud sa 34 minutos ug gideklarar kining fire out mga alas 6:21 sa buntag.
Matod ni Codilla nga posibleng ang ubang miyembro sa pamilya nahinanok pagkatug sa ikaduhang andana sa balay ug atol sa insidente, nahugno kini paubos hinungdan sa pagkapaig niini.
“Akong duda ani kay nahugno to ang ilang higdaanan. Wa kagawas kay nangatog na,” ni Codilla.
Si Nestor, sa laing bahin, kinsa giingong naglisod og lakaw tungod sa balatian sa lawas, nisuway paggawas ug nitago sa kasilyas.
“Nagtuo nga maluwas sa CR nisud kay naa bayay tubig ang CR niya wa kahibaw nga mosud na ang aso. Aso namatyan ato,” ni Codilla nga niingong gisunggo pa si Nestor.