P400 mil gikan sa city jail

USA ka 30 anyos nga ginang nadakpan sa mga sakop sa San Nicolas police station human makuhai og kwarta nga mobalor og P400,000 nga gisud sa iyang bag ug dunay usa ka dakong pakete sa ilegal nga drugas niadtong Miyerkules sa buntag.

Ang suspek giila nga si Edelyn Lazona, taga sitio Bonbonan, Barangay Labangon sa syudad sa Sugbo.

Ang mga sakop sa San Nicolas police nagpahigayog Oplan Tokhang sa dan A. Lopez, Barangay Calamba sa Siyudad sa Sugbo samtang si Lazona sakay sa motorsiklo.

Dihang iyang nasugatan ang mga pulis nga nagtokhang nga gipangulohan ni Chief Insp Keith Andaya, iyang nalabay ang bag tungod sa kakuyaw.

Sa paghiling sa mga pulis, puno kini sa kwarta ug usa ka dakong pakete sa gituohang shabu.

Daling gigukod sa mga pulis si Lazona ug ila dayong nadakpan.

Giangkon ni Lazona nga gikan ang kwarta sa iyang uyoan nga naa sa Cebu City Jail nga giila sa ngan nga Edwin Lazona, alyas Wewe, nga nagatubang usab sa kaso sa ilegal nga drugas.

Matod niya nga gikan sa usa ka wa mailhing babaye ang maong bag aron ipadala pinaagi sa bangko apan wa pa niya kini mailhi kon kinsa ang iyang padalhan.

Sigon sa pakisusi sa kapulisan sa San Nicolas police station, nasuta nga ang padalhan sa maong dakong salapi mao ang usa ka Chinese national nga nagbase sa Pasig sa kaulohan.

Makatulo na ka mga higayon nga gisugo siya sa pagpadala sa kwarta pinaagi sa bangko apan wa siyay gitugan sa iyang gipadalhan sanglit nalimot na siya niini.

Giingong gawas sa operation ni Wewe Lazona sa sulod sa City Jail, makabaligya usab ni sa gawas diin ang iyang pagumangkon maoy gitahasan nga mamaligya.

Tungod niini makigalayon ang kapulisan sa dakbayan sa Sugbo sa bagong jail Warden sa Cebu City Jail aron mamonitor ang ilegal nga negosyo ni Lazona sa sulod sa bilangoan.

Ang city jail bago lang gironda sa kapulisan, diin P4.6 milyunes nga kwarta, drugs ug mga kontrabando ang nasakmit.

Si jail warden Jessie Calumpang niingon nga nisaad na kaniya ang mga mayor matag selda nga wa nay drugas nga makalusot.

BALWARTE NI JAGUAR

Gitokhang sa mga sakop sa Mambaling police station ang mga silingan ni anhing Jeffrey Diaz alyas Jaguar, diha mismo sa iyang tugkaran sa Barangay Duljo Fatima, ning dakbayan.

Di lang porlon ang ilang dala, gikargahan pa kini og lungon aron ipakita sa mga nalambigit sa ilegal nga drugas sa maong barangay nga kon magdumili sa pagsanong sa ilang panawagan, dako ang posibilidad nga masulod sila sa lungon.

Matod ni Sr Insp. Eugene Tevez, deputy chief sa Mambaling police station, nga daghan pa gihapon ang nalambigit sa drugas sa Duljo Fatima bisan kon duna nay nangatumba ug mitahan sa ilang kaugalingon.

Daghan na usab ang mibalik sa ilang ilegal nga negosyo nga kaniadto misaad nga moundang.

Niawhag ang mambaling police station nga aron di masulod sa lungon nga gikarga sa porlon, mo surrender na.

“Daghan pa gyud ning mga drug personalities dinhi mao nang atong panawagan nila nga mo surrender nalang sila sa police station aron dili sila masulod anang lungon,” matod ni Tevez.

Daghan sa mga residente ang wa moluwat og pamahayag labot sa pagdala og lungon sa mga police.

Matod pa nila nga bahala na ang mga pulis sa mga badlungon sa ilang lugar nga naghatag og bati nga imahin sa ilang barangay.

“Dili lang ko mo react, Sir, kay ilaha man sad na,” matod ni nang Elena nga wala motugan sa iyang apilyedo sa Superbalita Cebu.

Midugok hinuon ang mga tawo sa barangay Duljo human madungog ang kanta nga kontra sa drugas.

Samtang 33 anyos nga gipaubos sa oplan tokhang sa Fuente police station ang wala mopatuo sa kapulisan gibuy bust ug nakuhaan og dili momenos lima ka gramo nga gituohang shabu nga mokantidad og P20,000.

Ang dinakpan giila nga si Francis Aniñon, taga Visitacion Extention barangay Sambag 2 sa syudad sa Sugbo.

Matod ni Chief Insp. Hartzel Peter Bellido nga wa malakip sa target list si Aniñon sanglit usa lang ka manuyopay apan nahibawan nila nga namaligya na hinungdan nga ilang gi buy bust.