OBO mipahunong sa trabaho sa condo
NIISYU na og notice of suspension ug illegal construction ang Office of the Building Officials (OBO) sa kagamhanan sa siyudad sa Sugbo subay sa nahitabong pagkalusno sa retaining wall sa tukuronon nga condominium sa dalan Salvador Extension Barangay Labangon nga mikalas og usa ka kinbuhi.
Samtang, niluwat na usab ang Department of Labor and Employment (DOLE) 7 og cease and desist order human makita nga daghan og kalapasan ang maong proyekto.
Matod sa OIC sa OBO nga si Engr. Josefa Ylanan nga automatic nga mopagawas sila og notice of suspension ug notice of construction human ilahang makita nga dunay kalapasan nga nahimo ang Cebu Landmaster nga maoy developer ug J.E Abraham C. Lee Construction and Development Inc.
Dugang ni Ylanan nga subay sa ilang gihimong pakisusi sa lugar ilang nasuta nga dunay excavation sa foundation nga walay labot sa permit nga giisyu.
Ilang gipa- verify ug nahibawan nga ang permit nga giisyu sa Siyudad niadtong Hunyo ning tuiga alang lang sa demolition sa kasamtangan nga bodega ug wala silay kasayuran nga nagpadayon ang pagkawot og yuta sa lugar alang sa foundation sa building.
Dugang ni Ylanan, ang gilawmon sa excation dulan na sa 6 metros ug nakita sab sa inspectors nga ang sheet pile nga maoy nagpugong sa paril nga nalusno.
Sigon sa OBO nga nakalapas ang kontraktor lakip na ang developer sa maong proyekto kay wa man sila makakuha og excavation permit sa foundation ilabi na nga demolition permit lang ang gihatag sa Siyudad.
Ang DOLE 7 niasoy nga daghan sila og nakitang kalapasan sa maong construction site atol sa ilang pakisusi sa dapit.
Matod sa director niini nga si Exequiel Sarcauga nga sa pagabot sa mga tinugyanan sa ilang ahensiya sa dapit wala kini’y safety engineer, construction safety and health program ug wala’y napakita nga certificate gikan sa TESDA ang operator sa backhoe ug wala usab kini matesting.
Gawas niini, wala usab makapakita ang mga kadagkuan sa construction site sa ilang design, dili usab kompleto ang ilang personal protective equipment (PPEs).
Tungod sa mga kalapasan ang ahensiya mipagawas kini og cease and desist order diin giserve kini gahapon hangtod nga matarong sa kontraktor ug developer ang mga kalapasan.
Human sa pagisyu og order ipatawag usab sa DOLE 7 ang kontraktor lakip na ang developer aron mopatimaw alang na sa mandatory conference ning semana.
Samtang, ipa- autopsy sa kapolisan ang lawas ni John Eric Llera, 22, welder sa condo nga namatay sa aksidente.
Mao kini ang gibutyag ni PO3 Winston Magdadaro sakop sa homicide section.
Matod sa nakuhang inpormasyon sa kapulisan nga dugay nakuha si Llera nga taga Canlumampao, siyudad sa Toledo nga natabunan sa yuta.