Paz, konseho wa manumpa sa PDP-Laban
WA maapil si Lapu-Lapu City Mayor Paz Radaza ug ang mga sakop sa konseho sa pagpanumpa ngadto sa Partido ng Demokratikong Pilipino (PDP) - Laban niadtong Sabado.
Si PDP-Laban mayoral candidate Rolando Patalinjug sa miaging piniliay wa na mahibulong sa lakang sa ilang kaatbang nga gihulagway nga dili loyal ngadto sa partido diin sila unang nasakop.
Gitug-an ni Radaza nga wa sila malakip niadtong mga konsehal gikan sa laing local government unit (LGU) nga nanumpa agi’g pagtapon ngadto sa administrasyon ni Presidente Rodrigo Duterte.
Nipasabot ang opisyal nga wa makompleto ang ilang mga dokumento nga maoy gikinahanglan alang sa maong kalihokan.
“Na- late ang among papers, ang information data sa each councilors. Mao to wa mi modayon,” tipik sa pamahayag sa mayor atol sa press conference kagahapon.
Sumala pa nga mohangyo ang kampo ni Radaza og laing schedule alang sa maong katuyoan ug kon gikinahanglan sila nga mobiyahe sa kaulohan, ila kining buhaton.
Nagkanayaon si Radaza nga dako og bintaha kon magpasakop sila sa administrasyon gikan sa Liberal Party (LP) alang sa kalambuan sa Lapu-Lapu, ilabi na nga ilang gisuportahan ang kampanya ni Duterte batok sa illegal drugs.
Samtang, si Patalinjug, standard bearer sa PDP Laban sa Lapu-Lapu sa miaging piniliay, niingon nga maniid ang ilang grupo kon dawaton sa administration party silang Radaza, ilabi na nga sila maoy orihinal nga miyembro.
“Mao man gyud nang mga Radaza, magbalhinbalhin (political party),” pamahayag ni Patalinjug sa dihang nahinabi sa
Superbalita Cebu.
Ang mayor sa iyang bahin, masaligon nga dawaton ang ilang pundok sa PDP-Laban sanglit sila maoy elected official sa dakbayan ug wa silay laing gitan-aw apan ang kinatibuk-ang kaayuhan sa Oponganon.
Si Pantaleon Alvarez, house speaker sa Ubos Balay Balaoranan maoy mipahurar sa 300 ka mga napiling opisyal gikan sa nagkalainlaing lungsod sa lalawigan sa Sugbo isip bag-ong mga sakop sa PDP-Laban nga gipahigayon sa Sacred Heart Center, dakbayan sa Sugbo.
Hangtod ning pagsuwat, daghang gihugonhugonan nga motapon sa PDP-Laban.