Reklamo sa collection sa Abellana
KANUNAY gi-ingon sa atong mga education officials nga libreng edukasyon sa mga tinun-an sa mga pampublikong tunghaan. Aduna lay mga itemized collection sama sa Boy/Girl Scout, anti-TB ug uban pa. Pero adto na kini kolektahon samtang magdagan na ang klase ug dili sa enrollment. Apan ang ubang nga maestra dili gyud makasabot. Ang uban dili mopirma sa clearance sa mga estudyante kon dili makabayad sa mga legal contribution og sa mga mawalang libro.
Ania kitay nadawat nga suwat-reklamo gikan sa usa ka inahan nga nagpa-ila lang sa ngalang ‘Sally’ kinsa mipadayag sa iyang reklamo kabahin sa daghang mga amutan sa eskuwelahan. Ani ang iyang suwat: Sir Bob, ‘Sir, akong mga anak mag-eskuwela sa Abellana National High School Grade 7 ug Grade 8. Vendor ra ko Sir unya ang akong bana usa ra ka construction worker. Namalihug ra ko Sir og pasuwat ani sa internitan nga among silingan. Sir, nabug-atan na gyud ko aning mga maestra sa Abellana National High School nga kusog kaayong manguwarta ug magpabayad sa mga estudyante. Hapit kada adlaw naa may bayranan labi na sa subject nga Values ug naa pay computer nila nga ICF. Tag-P100 kada estudyante unya daghan kaayong mga sections. Kada grading magpalit og projector. Gikinahanglan ba gyud na Sir? Dili ba nag-ingon man to si Pres. Rodrigo Duterte sa TV news nga ‘no collection policy’ sa mga eskuwelahan labi pa sa mga public schools?’
‘Naglisod mi bisan pagpalit og bugas ingon man sudan kay ang akong bana walay tarong trabaho kay dili pa regular. Gusto kaayo mo-eskuwela ang akong mga anak Sir bisan maglakaw sila pa-ingon sa eskuwelahan. Manghinaot ko Sir nga unta matabangan ko nimo nga mahunong na kining maong pagpangulekta sa mga maestra ngadto sa ilang estudyante kay dako kining problema sa mga ginikanan. Nasayod ko nga dili lang ako ang nagka-problema ani. Pait gyud kaayo.’
‘Mahadlok ang akong mga anak kay basin og kontrahan sila sa ilang mga maestra kay mibahad kuno ang ilang mga maestra nga hagbungon kon mo- report sa radyo. Ila naman kining gi- report sa guidance counselor ug principal pero wala may aksiyon. Tabangi intawon mi Sir.
(O, atensiyon school principal ug mga DepEd officials. Puwede bang ma-imbestigahan ninyo ning maong reklamo aron masuta kon tinuod ba ni? Ug kon tinuod unsa ang inyong mahimo ani kay basin nagbuot-buot lang ang mga maestra ani. Unsa kaha ang justification sa mga magtutudlo kabahin ning maong collection).