Imbestigasyon batok kang Senadora Delima
SI Senadora Leila de Lima mag-atubang og imbestigasyon sa Senado ug sa Ubos Balay-Balauranan kalabut sa ginadiling drugas.
Sa Ubos Balay-Balauranan manubag siya kon nganong sa justice secretary pa siya nagpadayon ang mga druglord sa ilang negosyo sa shabu bisan anaa sud sa New Bilibid Prison (NBP). Gawas kini sa libreng pagpasud og mga armas ug mga babaye’ng mugbo og lupad nga molingaw kanila samtang sila naghudyaka hapit kada adlaw. Ang maong bilangguan ubos sa sa pagdumala sa Department of Justice (DOJ).
Gituhoang nagsugkay kun naghimo usab og shabu ang mga piniriso nga ubos sa mga druglord sud sa prisohan.
Gisaway ni Sen. De Lima ang himuong imbestigasyon ug misaad nga dili motambong niini. Tumong kuno niini mao lamang ang pagdaut sa iyang pagkatawo agig bawos ni Presidente Rodrigo Duterte sa iyang pagpa-imbistigar niini kalabut sa Davao Death Squad (DDS).
Angayan lang nga motambung si de Lima sa maong imbestigasyon aron sa pagtubag sa mga pasangil sa mga testigos batok kaniya. Sumala pa sa Department of Justice (DOJ) nga aduna na silay affidavit sa mga piniriso, jail guard, ubang opisyal sa Bilibid ug sa mismong kanhi drayber ni de Lima, nga gidudahang iya usab nga hinigugma, nga makadaut sa senadora.
Sa laing bahin, ang Senate Ethics Committee nga gipangulohan ni Senador Tito Sotto moimbistigar usab niining reklamo ni abogado Abelardo de Jesus batok kang de Lima.
Ang mga sakop sa maong komitiba nga sila si Ping Lacson, Gringo Honasan, Riza Hontiveros mitambong sa organizational meeting ug nagkasabut nga himuong sekreto ang ilang imbestigasyon aron dili kuno makahimo og premature publicity.
Nganong mahadlok man sila og premature publicity nga giyagyag na man sa publiklo ni Pres. Duterte kining iyang pasangil batok sa senadora nga maoy gibasihan sa maong reklamo? Si kinsa may wa pa masayud niining maong isyu?
Nagpaabut ako nga supakon sa katawhan kining hilom nga imbestigasyon sa ethics committee. Buot sa mga tawo nga makakita sa mga ebidensiya ug makabati sa mga testimoniya batok kang Senadora de Lima.
Kon gihimong publiko kadtong impeachment trial batok kang anhing chief justice Renato Corona nga wa mopahibawo sa iyang tinuod nga katigayunan ug salapi sa iyang statement of assets, liabilities and net worth (SALN) nganong ato mang hikawan ang katawhan sa imbestigasyon sa dakung opisyal sa nasud nga gipasanginlang nagprotihir sa mga drug lord?
Kon himuong sekreto ang imbestigasyon sa ethics committee nahadlok ako nga magduda ang katawhan nga adunay pabor nga himuon ang mga kauban ra usab niyang mga senador aron dili kaayo siya panghimara-uton sa katilingban.