CPDRC, house of horrors na?

GUSTONG impa-imbestigar sa Kongreso ni House Deputy Speaker ug Cebu third district Rep. Gwendolyn Garcia ang mga kahiwian nga nahitabo sa Cebu Provincial Detention and Rehabilitation Center (CPDRC).

Sa usa ka privilege speech didto sa hawanan sa Kongreso, giyagyag ni Garcia ang mga “horror stories” nga nahitabo sud sa CPDRC.

Naunsa na man diay ang CPDRC, ang pinuy-anan sa popular kaayo nga mga dancing inmates, nahimo nang “house of horrors”?

*** Ang mga “horror stories” ni Garcia, kanhi gobernador sa Sugbo sa tulo ka termino, naglakip sa pagronda sa CPDRC niadtong Agusto 13 nga nakadiskubre ug nakasakmit sa mga kontrabando lakip na sa illegal nga drugas nga naghimo niini nga usa ka drug den.

Lain pa mao ang pagtugot sa pagbuhi og mga manok nga igtatari sud sa CPDRC, ang pagpuga sa usa ka piniriso, ang pagkamatay sa napulo ka mga binilanggo tungod sa kaso sa pulmonya ug uban pa.

Bitaw, nganong nakuhaan man og drugas ang CPDRC? Mas luwas tingali kon adto mogamit og drugas sa sud kay way tokhang?

*** Gibasol ni Garcia si Cebu Gov. Hilario Davide III sa mismanagement sa CPDRC.

Matod pa ni Garcia, “The CPDRC was a source of pride, a best practice model. How has it come to this? Who is responsible? Who else? How have we, in such short a time, transitioned from pride to peril, from showcase to shame? It is a tragedy how quickly we’ve descended from a real-life ‘Jail House Rock’ to hitting rock bottom.”

Tan-awon lang unya nato kon mosayaw ang mga dancing inmates. Kon magkurog-kurog gani, tingalig nangitag shabu kay istrikto ang mga pulis nga mao karon ang gipabantay kanila.

*** Gikomedyahan pa ni Garcia ang paglakip ni Gobernador Davide sa “honor list” sa napulo ka mga gobernador nga gipasidunggan sa Department of Interior and Local Government (DILG) tungod sa ilang mga programa sa pagsumpo sa illegal nga drugas.

Matod pa ni Garcia, “The irony of ironies is we now find Governor Davide in the DILG’s ‘ honor list’ of 10 governors to be cited for stemming the illegal drug trade in their respective provinces. As his misspelled name says on the list, it’s a ‘hilarious’ turn of events.”

Porbida sab ning DILG, gisayop man gud ang espeling sa ngan ni Gobernador Davide nga imbis Hilario, gihimo mang “Hilarious.” Matod pa ni Garcia, ang mga “horror stories” sa CPDRC nga nahimong popular sa dancing inmates ug nahimong drug den, natapos sa usa ka “comedy of errors.”