Mga dagkong kalingawan gipahigayon

LAING titulo ug korona sa kaanyag ang nadala pag-uli sa usa ka Sugbuanong dalaga niadto lang niaging bulan. Kini mao ang Jewel of the Philippines 2016 nga nadaug ni Natasha Angela Lim Manuel didto sa kaulohan.

Bag-o lang kini nga bangga sa kaanyag ug si Natasha ang labing una nga mananaug. Ang inila nga fashion designer nga si Lemuel Rosos ang franchise holder sa regional search diri sa Cebu pero tungod sa kahagip-ot na sa panahon sa paghimog pageant o bisan screening man lang, gipugnit na lang ni Lemuel si Natasha kay usa man sab ni siya sa iyang mga models. Nakaapil na kini si Natasha sa Ms. Mandaue sa 2013 ug sa Ms. Cebu sa 2014 pero wa siya swertiha sa duha ka bangga.

Ang tag-iya sa Jewel of the Philippines pageant nga si Jonny dela Vega nagplano nga maghimog Jewel of the World sa umaabot nga Marso. Kon madayon, kini ang ikaduhang international nga bangga sa kaanyag nga dinhi sa Pilipinas magsugod. Karon pa lang, atong panghinauton nga malangkat ni Natasha ang labing unang korona isip Jewel of the World sa sunod tuig.

Gipahigayon ang 10th Huni Halad kang Santo Nino (HuNino) niadtong Sabado, Agosto 27, didto sa Basilica del Santo Nino Pilgrim Center.

Nindot ang mga finalists pero duna man gyuy motuyhakaw aron molangkat sa grand prize ug kini mao ang kanta nga Sa Imong Kaluoy, O Santo Nino nga ginama nila ni Richter, Queenie Rose ug Russel Alegado ug gikanta ni Reycel Punay.

Didto ko unang nakakita sa bagong rector sa Basilica nga si Fr. Pacifico Nohara Jr. Nikanta ang kanhi rector nga si Fr. Jonas Mejares ug gani nakigduweto pa kini uban sa pinasidunggang dinapit nga si Isay Alvarez. Lain na usab nga malampusong pagpahigayon sa HuNino. Mga pahalipay!

Mga pahalipay akong ihatag ngadto ni Stephany Patana Mananquil nga nihimo sa iyang konserto adtong Dominggo sa Waterfront Cebu City Hotel & Casino. Daghan ang nanan-aw.

Apil sa mga guests ni Stephany sila si Von Saw, Anna Fegi, Daniel Matsunaga, Dulce ug Alden Richards. Wa na ko makaabot sa pagkanta nila ni Von ug Anna kay nasangit sa finals sa The Voice Kids 3.

Nakigtigi si Stephany kang Dulce sa kantang I Know Him So Well. Wa hinoon motugot si Steph nga lamyon siya ni Dulce. Di sab tingali tuyo ni Dulce nga mosapaw kay didto siya aron man pagsuporta.

Hinoon, dihang naglanoglanog na ang tingog ni Dulce dihang siya na lang ang nahibilin sa tablado, kusog usab ang mga pakpak nga iyang nadawat labina dihang iyang giawit ang Maala-ala Mo Kaya.

Wa papugong ang mga tawo sa ilang pagdayeg kang Dulce kay nag- standing ovation gyud kini pagkahuman sa Ako Ang Nagwagi.

Nisamot kasaba ang ballroom dihang nitungtong si Daniel Matsunaga nga gisundan ni Alden Richards. Nibalik si Steph kuyog ang mga dancers alang sa panghinapos niyang mga awit. Mga pahalipay, Steph, ug sa imong mommy nga si Aida Patana!

Wala seguro kaayoy nakabantay nga didtoy mga artista sa Kapamilya network sa Plantation Bay Resort & Spa. Duol sa usa ka semana sila didto. Mga artista kini sa komedyang teleserye nga Funny Ka, Pare Ko nga makita sa CineMo, usa sa mga channels sa ABS-CBN TV Plus black box.

Dinhi sila si Karla Estrada, Bayani Agbayani, Jayson Gainza, Alura, ang mga child stars nga sila si Jessie James ug Chun Sa, Crazy Duo, ToMiho, No Direction ug ubang mananaug sa bangga sa pakatawa kanhi sa It’s Showtime.

Dinhi usab ang pila ka mga bosing nga sila si Linggit Tan, Aaron Domingo, Alex Punzalan, John Red, Mark Awitin ug uban pa. Atangi ang maong episode nga nagpakita sa kaanindot sa Plantation Bay Resort & Spa isip background sa mga esena.

Naghuot gyud ang mga nanan-aw sa pasundayag ni Vina Morales didto sa Teatro Casino sa Waterfront adtong Martes.

Daghan ang nidayeg ni Vina tungod kay di lang kini maayong mokanta, maayo usab kining mosayaw. Ang Discojammers ang iyang backup dancers. (Uy! Malipayong pagsaulog sa ika-20 nga kasumaran, Discojammers!)

Gisulti ni Vina nga adto mismong adlawa, ang iyang Papa Ikeng Magdayao ug igsuong si Shaina didto sa Lapulapu kay nagsyuting si Shaina og usa ka indie movie nga horror.

Maayo untag masalida kini sa mga sinehan dinhi sa Cebu. Nangimbitar pa untag dinner si Vina kuyog nilang Buddy, Evelyn ug Arlyne Hisoler pero nibalibad na lang mi sa akong higalang si Rolito Inzo kay nagduka na mi. Gawas pa, pulos mi nag-diet. Charuz dela Cruz! Haha!