Nahilo sa sinungkab

“NAHILO sa sinungkab!” Way laing pagya ang naglibot-libot sa silinganan nilang Bobby ning kabag-uhan. Ulitawo pa si Bobby apan way trabaho. Bisan pa niini buhong siya sa pagkaon ug ilimnon. Nanambok pag-ayo. Beer kanunay imnon. Hapit kada gabii tagsa ka kahon mainom. Humba pirme ang sumsoman. Tungod kini kay duna siyay ‘sugar mommy.’

Si Adela ang ‘ sugar mommy’ ni Bobby. Si Adela ikaduhang asawa ni Lucio, usa ka tiguwang nga retiradong magtutudlo. Mga lima ka tuig na sukad namatay ang unang asawa ni Lucio. Dakog madawat nga kuwarta ang retirado matag bulan kay duhay iyang pensiyon gikan sa GSIS ug SSS. Nakatudlo man sab si Lucio sa pribadong eskuylahan. Si Adela ang tigpa- cash sa binulan nga mga tseke sa tiguwang. Siya ang nag-badyet sa maong pensiyon. Mas dako iyang datung ngadto kang Bobby nga ka-edad ra niya, 25, kay si Bobby maoy tighuman sa nasugdan sa tiguwang.

Ang romansa sa tiguwang igo rang makapainit sa lawas ni Adela. Unya maluya dayon ang tiguwang ug mahikatulog. Inigka hinanok sa tiguwang mobalhin si Adela sa laing lawak diin tua na daan si Bobby. Gihatagan ni Adela og yawe si Bobby aron kini makasulod sa balay sa tiguwang bisan unsang orasa. Tulo ka tuig na nga ingon niini ang sitwasyon sa ilang kinabuhi. Duha nay anak nilang Adela ug Bobby nga malipayong giangkon sa tiguwang.

Way nakapanalipod sa tiguwang batok sa binuang sa asawang batan-on. Tungod sa kadawo ug kasalbahis sa tinagdan sa tiguwang sa iyang duha ka anak nga lalake, nanglayas sila. Ug gipanghimaraot nila ilang amahan.

Sa pagpanglabay sa mga adlaw, usa ka buntag napalgan na lang si Bobby nga wa nay kinabuhi sulod sa iyang lawak. Pangagpas sa mga silingan si Bobby gibangungot o giurom kay wa may samad o bun-og ang iyang lawas. Sumala sa mga pulis nga nag-imbestigar, way ‘foul play’ nga nahitabo. Apan ang resulta sa ‘ autopsy’ nagmatuod nga gi-atake sa kasingkasing si Bobby kay hayblad. Nabugtoan og ugat sa utok. Pero ang kadaghanan sa iyang mga silingan miingon gyud nga nahilo siya sa sinungkab.

(KATAPUSAN)