Love is not blind
HUMAN magkatinan-away ang akong mga amiga sa usag usa, nagkadungan sila pagtutok nako. “Abir, nganong nakaingon ka man, Margs, nga di buta ang gugma?” Mipahiyom ko. Giatubang ko ang nangutana nako.
“Abi ninyo mga, Miga, kitang mga girls mosugot sa laki nga nangulitawo nato nga atong nagustohan. So, nakahibawo gyud ta kon kinsa ug unsa siya? Unya, nganong moingon man ta nga buta ang gugma?”
Nagtinan-away na sab ang akong mga amiga sa usag usa. Nakapanglingo sila. Wa na sila magtingog. Maybe, nahunahuna nila nga husto ko.
Sa pagpanglabay sa mga adlaw, hingpit nang wa nako hatagig pagtagad si Mon. Dali ra siyang nawala sa akong hunahuna. Labaw nang wa na ko maghunahuna sa iyang gugma nako. Sa laing bahin, si Andrie nagpadayon sa pagpangulitawo nako. Sagunson na siyang mamisita nako. Bisan gani og mag-uwan, kalit lang siyang moabot sa among balay.
“Margs, wa na man diay mangulitawo si Mon nimo, no? May nagsugilanon nako ani.”
Nakapahiyom ko kay sa nawong ni Andrie, wa niya ikatago ang gibating kalipay. Aw, kinsa man say di malipay nga wa na man siyay karibal nga guwapo ug macho? “Wa na, uy, Andrie. Gi-basted ko na siya.” “Unsa kaha ko, no, Margs? Si Mon nga pareson kaayo mo, guwapa ug guwapo, wa ka man gani maghunahuna ani? Ako pa kaha nga batig hitsura?”
Gipahiyoman ko si Andrie. Di ko gusto nga ipakaubos niya pag-ayo ang iyang kaugalingon. Tinuod nga di siya maayog hitsura pero nagbaton siyag kabuotan nga wa kang Mon. Nasuta ko sab nga mapaubsanon siya. Mao ra bay gusto ni Kristo ang tawo nga mapaubsanon. Kanunay ko kining madungog sa homily sa pari kanang manimba ko.
“Ayaw paghunahuna ana, uy, Andrie. Ang hitsura panggawas lang na. Mawa’a ni inig-abot sa pagka tiguwang. Ang maayo ug batig hitsura maparehas ra na kon mamatay. Di na mailhan ko hain ang maayo ug hain sab ang bati kon pulos na kalabera. Samtang ang kinaiya matunhayon.”
Sa akong tan-aw kang Anrie, sangko sa langit ang gibati niyang kalipay. Wa man sab ko magbasol sa akong kaugalingon nga nasulti ko kadto niya? Sa kadugay na niyang pagpaninguha sa akong gugma, inanay kong nabatyagan ang kausaban sa gibati ko niya.
Di lang kay kaluoy ra ang nabatyagan ko ngadto niya. Inanay na kong nakat-on sa pagmahal niya. Unya malipayon si Andrie nga mipauli kay gidawat ko na ang iyang gugma.
(KATAPUSAN)