Kabaho sa landfill gireklamo sa mga negusyante
MIREKLAMO na ang daghang mga magpapatigayon ngadto kang Presidential Assistant for the Visayas Michael Lino Dino nga naapektahan ang ilang patigayon gumikan sa kabaho sa mga basura nga gilabay sa landfill sa Barangay Inayawan, siyudad sa Sugbo.
Siya nibutyag nga apektado na ang kita sa mga negosyante nga nahimutang duol sa landfill.
“Daghan na kaayo sad not only katong mga tawo diha, ang business sector pud medyo nireklamo na because their sales went down by 60 percent, 70 percent and that is unacceptable,” pamulong ni Dino ngadto sa mga tigbalita.
Siya ang usa sa mga dinapit nga bisita atol sa 4th Mega Cebu Month karong Septiyembre sa Metro Cebu Development and Coordinating Board sa SM City Cebu kagahapon.
Matod niya nga makigtagbo siya sa mga opisyal sa Department of Environment and Natural Resources karong semanaha tungod kay gusto siya masayod sa tinuoray nga isyu bahin sa paglabay og basura sa Inayawan landfill.
Gusto siya mahibawo kon unsay baruganan sa DENR 7 sa subli nga pagbukas sa Inayawan landfill ug paglabay sa mga basura nga gipasirad-an na kini sa maong buhatan panahon sa administrasyon ni kanhi Cebu City mayor Mike Rama.
Ang landfill gilabayan og balik og mga basura pipila ka adlaw sa wala pa molingkod sa iyang puwesto si Cebu City Mayor Tomas Osmeña.
Mopatawag usab og tigom si Dino sa mga molupyo, negosyante ug ubang stakeholders kay gusto siya maminaw sa habig ug yangongo niini bahin sa maong isyu.
Nagpaabot siya sa position paper nga ipadangat sa mga magpapatigayon ngadto niya.
“Kining mga businessmen naglisod na, kining mga tawo naglisod na sad sila, baho kaayo. If it’s bad for the economy, it’s bad for the people,” dugang ni Dino.
Gusto usab siya makahinabi og mga eksperto kon aduna bay paagi nga mawagtang ang kabaho sa mga basura sa dapit diin kasikbit ang mga kan-anan ug ubang balay patigayon.
Samtang, tungod sa kabaho nga nasinati sa mga tinun-an sa University of Cebu Mambaling Campus gikan sa Inayawan dumpsite, niabot na sa higayon nga mag- face mask sila nga mag-klase.
Mao kini nga hulagway ang nikatap sa Facebook diin mismo ang magtutudlo nila ang ni- upload aron ipakita sa awotoridad ang kasamtangan nga nasinati nila samtang magklase.
Ang nag- post sa maong mga mga hulagway mao si Environmental Planner Emmanuel Crucio kinsa magtutudlo sa UC-METC Mambaling campus.
Gihulagway niya bahong hugaw sa tawo ug patay ang masimhotan nila atol sa pagpahigayon nila sa klase.
Ang first year marine engineering student sa maong tunghaan nga si Ernest Christ Ando niingon nga dunay higayon nga manimaho ang Inawayan landfill hilabi na kon kusog ang hapak sa hangin.
Giangkon niini nga usahay mawala siya sa focus sa iyang pagtuon ilabi na kon masimhotan niya ang kabaho sa basura ug kanunay nalang kini magandam og panyo aron panagang kon moalisngaw na sab ang baho.
Si Cebu City Councilor Joel Garganera kinsa usa sa nangusog nga dili una ipagamit og balik ang landfill niingon nga daghan na siya og reklamo nga nadawat labot niini.
Mao nga usa sa iyang plano aron masolusyunan ang maong problema sa umaabot nila nga session sa konseho, mopalabang siya og resolusyon alang sa dinaliang pagpasira sa landfill.
Apan mohatag siya og 15 ka adlaw aron pagpangita og laing kalabayan sa mga basura.
Apan kon di gihapon kini matuman, ang konsehal mosang-at og kasong Writ of Kalikasan sa Court of appeals batok sa mga tawo nga responsable sa pagbukas og balik ug nag- operate sa Inayawan landfill.
Si Cebu City Mayor Tomas Osmeña nibasol sa Konseho sa wala pag-aprobar sa P10 milyones nga gipangayo nila aron pagpalit og anapog panabon sa basura.