Way buy bust sa pagpatay sa mag-amahan?

NIALMA ang kabanay sa magamahan nga giingong nalambigit sa iligal nga drugas nga napatay atol sa operasyon sa kapulisan sa Brgy. Paknaan, dakbayan sa Mandaue ning bag-o lang.

Nireklamo ang kabanay nga gikawatan og dakong kantidad sa salapi ug alahas ang pamilya sa magamahan nga silang Jerome Abad, 43, ug anak niini nga si Junmar, 22, kinsa pulos napatay sa operasyon niadtong Martes sa kadlawon.

Apan ang hepe sa kapulisan sa Mandaue City nanalipod sa iyang mga tawo ug nihagit sa mga kabanay sa pagpasaka og reklamo.

Si Allan (tinuod ngan gipugngan tungod sa iyang hangyo), pagumangkon ni Jerome, niangkon nga nalambigit sa paggamit ug pagpamaligya og iligal nga drugas si Jerome apan way labot ang anak niini nga si Junmar.

Sumala pa ni Allan nga way buy-bust operation sa balay sa banay nga Abad tungod kay natug ang tibuok pamilya. Si Jerome, matod pa, sayong natug niadtong gabhi-ona tungod kay hubog.

Giingong way gihuptang drugas si Jerome kay matod pa “nahurot” na kini duha ka adlaw sa wa pa ang operasyon” ug buot na magbag-o iyang uyuan.

Si Allan nagkanayon nga sa insidente, base sa taho sa asawa sa napatay nga si Stella, nga nagpakiluoy pa si Jerome nga di apilon ang iyang anak ug di hilabtan apan mao kini giuna og pusil.

Nahibung usab ang pamilya ni Jerome nganung ang gibutang sa kapulisan nga oras sa hitabo alas 3 sa buntag nga mga ala 1 pa atua ang mga operatiba sa balay sa nipanaw nga mag-amahan.

Ilang gikahibudngan nganung nagpondo sud sa duha ka oras ang operatiba sa balay ni Jerome nga mga ala una pa man kini nisulod didto.

NAWALA

Nipasangil sab si Allan sa pagkihinabi ning mantalaan nga nawala ang alahas balor P60,000 nga iyang giprenda sa iyang uyuan balig P5,000.

Gawas niini, ang iyang iyaan nga si Stella nagkanayon nga may P29, 000 nga kwarta sab kini sa bag nga nawa ug mga P600,000 nga salapi ni Jerome nga gitaguan sa vault nga iyang tinugum sa katuigan alang sa retirement nilang magtiayon.

Ilang gisaway ang report sa kapulisan tungod kay ang bugtong gideklarar nga salapi mao ang P10,200 nga kwarta nga personal nga salapi ni Junmar.

MCPO NAHIBUNG

Sa dihang gipangayuan ang hepe sa Mandaue City Police Office (MCPO) og reaksyon, nagkatawa lang kini kabahin sa mga pasangil.

Iyang gipahinumduman ang kabanay nga lehitimo ang operasyon tungod kay uban niini ang koordinasyon sa PDEA sa wa pa ang imbestigasyon.