Donaire moaway dungan ni Pacman

ILAKIP ni boxing promoter Bob Arum si fivedivision world champion Nonito “The Filipino Flash” Donaire nga moaway ubos sa Manny Pacquiao-Jessie Vargas card karong Nobiyembre 5, 2016 didto sa Thomas and Mack Center sa Las Vegas, Nevada.

Posibling makontra ni Donaire mao ang no. 1 WBO contender ug undefeated nga si Jessie Magdaleno kinsa adunay record nga 23-0, ug 17 ka knockouts.

Kon way kakulian, hayan usa ka blockbusting card nga naghubit sa hugot nga panagribal tali sa mga nag-una ug inilang Filipino fighters ug Mexican Warriors ang mapresentar sa Top Rank Promotions ning higayona.

Si Vargas (27-1, 10 Kos) ug Magdaleno pulos man tuod nagbasehan sa Las Vegas, Nevada apan ang ilang mga ginikanan pulos usab mga Mexicano.

Sa uwahi niyang away, si Magdaleno miknockout ni Rey Perez sa ikapito ka round. Iya usab nga napildi pinaagi sa unanimous decision si Raul Hirales, ang Mexicanong napildi usab ni Prince Albert Pagara sa Waterfront Hotel, dakbayan sa Sugbo.

Si Donaire sa iyang bahin, nakakolekta usab og upat ka sunodsunod nga kadaugan human sa iyang knockout nga kapildihan ni Nicholas Walters sa Jamaica.

Iyang gipangpildi sila si William Prado sa Brazil, French Anthony Settoul, Mexican Cesar Juarez ug ang Hungarian nga si Zsolt Bedak.

Gipadayag ni Arum nga mokabat ngadto sa 6,800 ka mga lingkuranan ang itagana sa Thomas and Mack Center ning awaya nga ang tiket mapalit lang sa $50 dollars ang presyo.

Niini gihangop ni Donaire ang maong kalambuan. Sa usa ka interview, si Donaire nagkanayon nga kaniadto pa nga naghandom siyang makaaway ubos sa card ni Pacquiao.