Commissioner’s call
NIADTONG Martes, kon entertainment ang hisgutan, di na siguro mabintahaan ang kulbahinam nga panagsangka tali sa defending champion University of San Carlos Warriors ug sa University of Cebu Webmasters sa CESAFI men’s basketball nga niagi pa og overtime diha sa Cebu Coliseum.
Daw sa di ka gustong palabyon ang matag aksiyon sa maong panag-engkuwentro kay gikan pa lagi sa sinugdanan hangtod sa katapusang yugto sa duwa, wa ka kita og duna bay nilurang sa ilang pagpakigkombati.
Nabiyaan man tuod og 10 puntos ang Webmasters sa third quarter apan ang fourth quarter nakigginabsanay kini og hupot sa liderato hangtod sa mga himatyong segundos.
Aron pagmubo sa istorya, natabla, 62-62, ang regulation period sa dihang usa ray nasulod sa free throws ni Condrad Catapusan sa katapusang tres segundos nga maoy naghatod ngadto sa five-minute extension.
Sa overtime period, daling nakaposte og labaw ang Warriors 69-63 apan ang three-point play ug ang undergoal stab ni JC Jabello sa Webmasters sa katapusang 31.3 segundos maoy naghatag og dakong hudlat sa Warriors, 69-67.
Naglabaw pa man tuod ang USC apan daw og sa mibali na ngadto sa UC ang momentum ning yugtoa. Pero kahibawo mo og unsay nahitabo?
Nadala ba kaha sa pressure o kaha nalingaw sa ka thrilling sa duwa, wa matawagi sa mga referees ang travelling violations nga nahimo ni Giovanne Laguyo nga unta diha man kini mahitabo atubangan kanila.
Bisan pa siguro ug natawagan to og travelling violations, posibling modaog gihapon ang Warriors kay duna pa may mga 20 kapin ka segundos.
Pero posibli usab nga makahatag katog pabor sa Webmasters ug makapausab sa resulta.
The point is, bisan kinsa ang modaog sa duha, basta dili lang kini ma- spoiled ug mahugawan sa tataw ug klaro kaayo nga sayop sa referee o mga referees, ilabi na niining mga krusyal nga segundos. Referees should not decide the game. Unfair sa duha ka teams.
Sa wa pa kini mahitabo, ang matag habig pulos nangreklamo sa mga tawag. Gani si coach Rommel Rasmo sa Warriors nagsigi ug hapak sa iyang kumo sa press table tungod sa kasagmuyo sa mga tawag.
Kon makapahamtang ta og silot ngadto sa mga players nga makahimo og salaod, nganong dili man usab nato kini himuon ngadto sa mga referees nga makahimo usab og mga krusyal nga kasaypanan?
Dili ni kay sa pag-unsa ngadto sa mga referees, kon dili usa kini ka pamaaagi aron sila madisiplina ug sa samang higayon makapamatngon kanila.
Unsaon nila pagkahibawo nga nasayop sila kon dili sila silutan sa ilang kasaypanan nga nabuhat. Di ba Commissioner Felix Tiukinhuy, Sir? Now it’s your call.
(junmigs0622@yahoo.com)