MAHINDRA BATOK ROS
Bag-ong import sa E-Painters subhan
SUBHAN sa naghingutas nga Rain or Shine Elasto Painters ang ilang bag-ong import nga si Jason Forte karong gabii pinaagi sa pagpakigsangka sa giant-killer Mahindra Enforcers sa 2016 PBA Governor’s Cup sa Araneta Coliseum.
Dili bag-o ni Forte ang pagduwa sa PBA sanglit nahimo na usab kini siya kaniadto nga import sa Alaska Aces ug sa Air21.
Iyang pulihan ang orihinal import sa Elasto Painters nga si Dior Lowhorn kinsa gipapauli na sa management.
Sa kasamtangan, ang Elasto Painters anaa sa ikaupat nga puwesto kauban ang Phoenix Fuel Masters nga may 3-4 nga baraha.
Tinguha unta sa Rain or Shine nga kuhaon si Greg Smith sa Colorado State Alum kinsa miabot niadtong Martes, apan nasubraan ang gitas-on niini sa height limit, matod ni Rain or Shine coach Yeng Guiao.
Si Forte nakaduwa sa Air21 sa dihang si Guiao mao pa ang coach sa maong team sa 2010 Fiesta Conference.
Apan mas naila siya og maayo sa Alaska nga maoy iyang nagiyahan ngadto sa third-place finish sa 2011 Governors Cup. Nahibalik usab siya og duwa sa maong team niadtong 2012 Governors Cup.
“He looks impressive,” matod ni Guiao sa dihang nakakita siya sa bag-o lang nga video footage. “And at least, he’s already familiar with the PBA brand of play.”
Ang Mahindra, sa ilang bahin, misulbong og maayo sa ilang standing ug gihulagway karon nga usa ka giant-killer human nila pakaginga ang San Miguel Beer, Alaska Aces ug sa niaging Biyernes ila usab nga nabuntog ang TNT Katropa alang sa 6-2 nila nga baraha.
Sugdan ang Mahindra-Rain or Shine match sa alas 7:00 sa gabii. Sa preliminary game, padayong manikaysikay ang nangiwit nga Star Hotshots sa ilang pagpakigsangka batok sa Fuel Masters.
Ang Hotshots, sa unom ka duwa, ka usa pa gyud makadaog ug nameligro nga sayo kining mataktak.
Lisod na man tuod alang kanila nga makaapas pa alang sa sunod nga round, apan wa kini magpasabot nga nawad-an na sila sa paglaom.