MIRIAM, 71, NAMATAY

MIDUAW. Si kanhi Senador Miriam Defensor Santiago mibisita dinhi sa Sugbo niadtong Pebrero, miatubang sa mga tinun-an sa University of Cebu-Banilad campus isip usa sa iyang paagi sa kampanya pagka presidente. Si Santiago namatay kagahapon sa buntag sa St. Luke's Medical Center diin siya naospital. Estorya sa pahina 3.

NAMATAY kagahapon sa buntag sa St. Luke’s Medical Center sa Metro Manila si Senador Miriam Defensor Santiago, 71, human sa pakigkombate sa cancer.

Ang senador, kinsa makatulo na ka mga higayon nga nidagan pagkapresidente sa nasod, ang katapusan sa 2016, di lang mahinumdoman sa iyang nagdilaab nga mga pulong, kon di sa iya usab nga lantip ug makalingaw nga pick up lines.

Sa matag buka sa baba ni Santiago, maminaw dayon ang mga tawo ug magpaabot sa iyang mga quotable line.

Nia ang pipila sa iyang mga sikat nga pick-up lines:

“Ibenta mo na bahay mo, total nandito ka na nakatira sa puso ko.”

“Sana naka-off ang ilaw, para tayo na lang mag-on.”

“Sana exam mo na lang ako, para sagutin mo rin ako.”

“Google ka ba? Lahat kasi ng hinahanap ko, sayo ko natagpuan.”

“Nakalimutan ko pangalan mo, eh. Pwede bang tawagin na lang kitang akin?”

Dili usab malimtan ang iyang gilitok nga pick-up lines dihang siya ang halandon nga mamumulong sa ika 77 nga commencement exercises sa University of the PhilippinesCebu niadtong 2014.

Kini sama sa “Password ka ba?” Dayon nitubag ang mga tawo, “Bakit?” Ug siya nitubag “Hinding-hindi kita malilimutan pero kayang-kaya kitang palitan.”

Nihirit pa si Miriam: “Bachelors degree ka ba? Kasi tapos na ako sayo eh!” Laing hirit niya “Summer ka ba? “Kasi wala kang class!”

Ang mga pick-up lines sa kanhi senadora dili na subli nga malitok niini ug madungog sa mga tawo human kini namatay sa cancer kagahapon sa buntag sa St. Luke’s Medical Center sa Bonifacio Global City sa panuigon nga 71anyos, pagkompirmar sa iyang bana nga si Atty. Jun Santiago.

Sa official Twitter account ni Miriam, kini nagpahibawo nga alas 8:52 sa buntag kini namatay.

Niadtong 2014, dihang ang babayeng magbabalaod ang nipahibawo nga duna siyay stage 4 lung cancer.

Siya ang labing unang Pilipino nga natuboy ngadto sa International Criminal Court nga nagbase sa The Hague, Netherlands niadtong 2011.

Apan wa siya moasumir sa puwesto tungod sa chronic fatigue syndrome.

Pagka Mayo 24, 2016, nisuwat siya ni Senate President Franklin Drilon ug nagpahibawo nga magmedical leave siya hangtod nga matapos ang iyang termino niadtong Hunyo 30, 2016 gumikan sa iyang gihambin nga sakit.