Mga senior modawat sa laing cash aid

LAIN na usab nga hugna sa financial assistance ang ipangtunol sa Cebu City Government ngadto sa libuan ka mga senior citizen sa dakbayan sa Sugbo ugmang adlawa.

Si Lea Japson, pangulo sa Department of Social Welfare and Services, nagkanayon nga aduna silay P67.3 milyones nga gitagana alang sa 67,300 ka mga lolo ug lola nga maoy anaa sa opisyal nga listahan sa Office of Senior Citizens Affairs.

Apan iyang gitataw nga posible nga di tanan makakobra gumikan sa pagkamatay.

Sama sa naandan, ang mga disbursing officer maoy moduaw sa 80 ka mga barangay kansang distribution ipahigayon sa venue nga gigamit sa miaging buwan diin gikobra sa mga senior citizen ang ilang tag P1,000.

Si Japson nagkanayon nga karong buwana, ang 12,000 ka mga persons with disability di makadawat kay adto na sa sunod buwan sanglit nagpahigayon pa sila og cleansing sa mga ngan niini, hilabi na kadtong nag edad na og 60 anyos pataas kay namatikdan niya nga nagdoble na og dawat.

Ang mga senior citizen adunay P12,000 nga dawaton sulod sa tibuok tuig samtang P5,000 sa mga PWD.