Apo mipatay sa iyang lolo kay tan-aw niya ungo

TALIBON, Bohol-Giluba sa usa ka lalake ang iyang 86 anyos nga apohan sa Barangay San Roque ning lungsod kagahapon sa sayong buntag.

Ang biktima giila nga si Simplicio Item, biyudo, kinsa wa nay kinabuhi ug nagbuy-od sa dihang naabtan sa mga pulis sa lungsod.

Ilang naabtan nga nagkatag ang nagkadaiyang parte sa iyang ginhawaan.

Ang suspek mao ang iyang apo nga si Jeffrey Item, 30, gikataho sa kapulisan nga may problema sa pangisip, nagpuyo uban kang Simplicio.

Ang taho sa kapulisan nagtumbok nga mga alas 5:40 kagahapon sa buntag, adunay “concerned citizen” nga nitaho sa ilang buhatan nga nagpahibawo nga may tawo nga linuog nga gipatay sa iyang apo sa Barangay San Roque.

Ang kapulisan gipangulohan ni PO3 Armand Abadies uban sa upat ka mga sakop sa Regional Public Safety Battalion (RPSB) 7 niresponde gilayon sa dapit.

Ilang naabtan si Simplicio nga diha sa kasagbutan duol sa iyang balay nga patay na ug nagpasad ang nagkadaiyang parte iyang ginhawaan.

Naabtan usab nila si Jeffrey nga napakalma ug nasikop sa mga barangay tanod sa San Roque.

“Ang iyang panan-aw sa iyang lolo nahimo kuno nga usa ka ungo,” matod ni PO3 Luigi Gabitan sa Talibon PNP dihang ilang gipangutana si Jeffrey.

Sa ilang inisyal nga imbestigasyon, nagtumbok nga mga alas 5:20 kagahapon sa buntag, si Simplicio naglingkod sa salakot duol sa iyang balay samtang si Jeffrey naglingkod usab sa gawas sa balay sa iyang amahan mga may 10 metros ang gilay-on gikan sa salakot.

Matod ni Reynaldo Item, anak ni Simplicio ug uyoan ni Jeffrey, nga nakasaksi sa insidente, nga ang iyang pag-umangkon mikuha og sundang unya milakaw paingon sa iyang amahan ug gitigbas ang agtang niini.

Dihang natumba si Simplicio, gibitad ni Jeffrey ngadto sa kasagbutan ug nisugod sa pagtigbas sa nagkadaiyang parte sa lawas sa iyang amahan, asoy ni Reynaldo.

Nisuway siya sa pagbuyag ni Jeffrey apan gipahimangnoan siya nga kon manghilabot siya ang isunod.

Nidagan nalang siya aron magpakitabang apan sa iyang pagbalik, ang iyang amahan patay na samtang ang tanan niyang ginhawaan nagpasad sa kasagbutan.

JECT/LTB