2 ka menor `naluwas’ sa pulis

DUHA ka mga babayeng menor de edad nga gituohang gamiton sa pagpamaligya og ilegal nga drugas naluwas sa kapulisan human madakpi ang ilang amo.

Ang operation gipahigayon sa sitio Mahayahay, Barangay Cansojong, dakbayan sa Talisay niadtong Miyerkules sa hapon.

Ang target sa kapulisan mao si Dondel Panilagao, 30, ulitawo, nagpuyo sa nahisgutang lugar.

Inabagan sa mga sakop sa Philippine Drug Enforcement Agency (PDEA) gihimo ang buy bust operation.

Nakuha gikan kang Panilagao ang upat ka medium pack sa shabu, lakip ang tulo ka tag P100 nga buy bust money ug laing P500 nga maoy gidudahang halin.

Atol sa operation, na- rescue sa kapulisan, ang duha ka mga babayeng menor, 15 ug 16 anyos, naabtan sa kapulisan sulod sa balay ni Panilagao.

Wa maningog ang duha dihang gisukitsukit sa kapulisan.

Ang mga batan-ong babaye gitugyan sa Department of Social Welfare and Development (DSWD) samtang si Panilagao gipasakaan nag kaso sa kapulisan.