PRO 7 miabag sa 2 ka pulis gikiha

ABAGAN sa Police Regional Office (PRO) 7 ang duha ka mga pulis sa dakbayan sa Sugbo nga gipasakaan og kaso sa inahan ni Jeral Cedeño sa Ombudsman human kini giingon nga gipatay sa barangay Tisa niadtong Hulyo 23 sa gabii.

Hugot ang pangangkon sa PRO-7 nga lehitimo ang gihimo sa duha ka mga pagpusil-patay kang Cedeño nga gialarma nga armado ug nakuhaan pa ug drugas sa iyang posisyon.

Ang mga police nga gipasakaan ug kaso mao silang PO2 Arnold Cabildo sakop sa City Anti Illegal Drug Special Operations Task Group ug SPO2 Renante Nioda sakop sa Special Weapons and Tactics.

Ang kabanay sa namatay nireklamo ngadto sa CHR sanglit atol sa hitabo giingong wala mosukol sa mga pulis ang iyang anak nga si Jerald ug gisulod matod pa kini sa ilang balay sa duha ka police ug gidala sa gawas ug didto gipusil bisan pa man sa ilang hangyo nga dili patyon.

Apan wala motuo niini si Gen. Noli Taliño tungod kay usa ka lehitimo ang gihimo sa iyang mga sakop.

“As to legitimacy sa operation eh legitimate naman yun. Mayron silang proper documents, lahat naman ng operation natin pina document para may investigation report,” matod ni Gen. Noli Taliño.

Andam nga mohatag ug ayuda ang PRO-7 lakip na ang Cebu City Police Office alang sa legal assistance sa duha ka mga pulis.

Matod ni Sr Supt. Joel Doria nga dunay mga kanhi huwes ug abogado dinhi sa siyudad sa Sugbo ang nipirma ug kasabutan nga motabang sila kung dunay mga pulis nga pasakaan og kaso tungod sa trabaho.

Si PO2 Arnold Cabildo nagkanayon nga una kining higayon nga siya napasakaan ug kaso.

Matod niya nga naguol siya sa iyang kabahin sanglit nagtrabaho lang sila isip mga police ug napasakaan pa ug kaso.

Apan andam niya kining atubangon tungod kay nasayod siya nga naa sila sa husto ug wala silay nalapas sa tawhanong katungod human nila makita ang armas sa suspek.

“Naa man gyud nang ma low moral ta pero gibuhat lang gyud namo among trabaho and we follow the rules of engagement sa pnp” matod ni PO2 Arnold Cabildo.

EXTRAJUDICIAL KILLINGS

Moabot na sa kapin 300 ka mga giingong extra judicial killings ang natala sa CHR 7 sukad niadtong Mayo 22 ning tuiga.

Ang maong datus gibutyag sa hepe sa investigation team sa CHR 7 nga si Leo Villarino.

Si Villarino nibutyag usab kagahapon nga aduna’y gimugna nga Task Force EJK diin gipangulohan kini ni CHR Commissioner Gwendolyn Pimentel-Gana ug nimando kini nga 60 ka adlaw lang ang imbestigasyon nila kabahin sa mga kaso nga nalambigit niini.

Base sa internal rules sa CHR, hatagan sila og usa ka tuig nga mohimo sa imbestigasyon sa matag kaso kanila tungod usab sa pagkuha sa kinahanglanon sa imbestigasyon ug espesyal kining EJK diin 60 ka adlaw ra.

Sa kapin 300 ka kaso nga namonitor sa CHR 7 sa EJK, sagad niini anaa sa Sugbo diin sagol kini operasyon sa kapulisan ug ang vigilante killings o kadtong pagpamatay sa wala mailhing indibidwal.

Walo usab ang gikompirmar ni Villarino nga nipasaka og reklamo sa ilang buhatan ug usa niini ang kaso sa 22-anyos nga si Jerald Cedeño, kinsa napatay sa duha ka pulis niadtong Hulyo 23, 2016.

Matod ni Villarino nga wala pa sila mahuman sa imbestigasyon sa kaso ni Cedeño human nidangat ang inahan niini nga si Patricia sa maong ahensiya.

Dugang niini nga dili sila kapugong sa inahan ni Jerald nga nipasaka na og kaso sa Ombudsman tungod kay katungod man niini nga mangita og laing legal nga remedyo.

Giklaro niini nga wala pa sila’y rekomendasyon sa kaso ni Cedeño ug padayon sila sa ilang imbestigasyon.