Baho sa Inayawan dumpsite
NIMINOS na ang baho sa dakong bukid sa mga basura sa Inayawan dum site human gipasiritan og inoculants sa Department of Public Services (DPS) sa dakbayan sa Sugbo.
Si Engr. Roberto Cabarrubias, pangulo sa DPS, niingon nga kagahapon maoy ikaduhang adlaw nga nipahigayon sila og spray human sila nipahigayon og emergency purchase balor og P499,000 nga inoculants nga maka- neutralize sa baho gumikan sa presensiya sa good bacteria sa maong kemikal.
Iyang gipadayag nga ang gidaghanon sa inoculants molanat hangtod sa mosunod nga 13 ka adlaw ug mopahigayon sila og public bidding sa maong kemikal para sa sunod nilang hugna sa pagpalit.
Ang usa ka putos nga inoculants sagulan og 200 litros nga tubig ug ipasirit sa presko nga linabay nga basura.
Matod ni Cabarrubias, ang P499,000 nga kantidad didto nila gikuha sa Accelerated Social Amelioration Program sanglit wala na kini magkinahanglan sa pagtugot sa konseho.
Iyang gipadayag nga adunay pundo nga kapin P1 milyon ang DPS ug posible nga mao kini kuhaan aron subling makapalit ang siyudad base sa makadaog sa bidding aron mamintinar ang baho sa landfill ug dili na mobalik sa kanhi niya pagbuga og baho nga hangin.
“Ang atong baho karon sa basura nimenos na. Di pareha kaniadto nga wala patay gibutang nga inoculants kay naa man tay gibutang nga good bacteria sa fresh garbage,” paghulagway ni Cabarrubias.
Nanghinaot ang kanhi konsehal nga maaprobahan sa City Council ang ilang gipangayo nga anapog nga maoy ilang itabon sa basurang bag-o nga linabay.
Gumikan sa pag-umido sa grabeng kabaho sa basura sa nilabay nga buwan, si Konsehal Joel Garganera, chairman sa committee on environment, niduso og petisyon ngadto sa Court of Appeals aron pangayuon ang writ of kalikasan para pugngan si Mayor Tomas Osmeña sa padayong paggamit sa landfill kansang life span niadto ra untang tuig 2005 napupos.