Seguridad sa CPDRC mas gihigpitan ni Davide

Human sa riot sa New Bilibid Prison

HUMAN ang nahitabong kaguliyang sa New Bilibid Prison, nga nikalas ug usa ka high-profile drug convict ug niangol sa uban pang piniriso, hugot karon nga gi- monitor sa Kapitolyo ang kahimtang ug kalihukan sa mga piniriso sa Cebu Provincial Detention and Rehabilitation Center (CPDRC).

Si Gob. Hilario Davide III malaumon nga dili mahitabo ang susamang riot sa provincial jail dinhi sa Sugbo.

Nagtuo si Gob. Davide nga dili imposible nga mahitabo usab sa CPDRC ang riot kaguliyang nga nahitabo sa NBP niadtong Miyerkules sa buntag.

Sa maong insidente, namatay ang convicted drug lord nga si Tony Co ug naangol ang pipila ka pa ka mga high-profiled inmates.

Ang CPDRC dunay 4 ka highprofile drug suspects nga naglakip sa giingong number 1 drug lord sa probinsiya sa Sugbo, nga si Alvaro Alvaro alyas Barok. Si Barok una nang ni- surrender sa NBI ug kasamtangang gipaubos sa isolation.

Matod ni Davide, gi-monitor sa Kapitolyo ang mga kalihukan sa mga piniriso sa CPDRC aron kalikayan nga magka-initay sila ug moresulta na hinuon sa pagpanakit sa laing binilanggo o di ba kaha riot diha sa prisohan.

Sa pagkakaron, hugot nga seguridad ang gipatuman sa CPDRC subay usab sa mga kausaban nga gipatuman alang sa mas hapsay nga pagpadagan sa pasilidad. Gawas sa jail guard ug blue guards, anaa sa CPDRC ang pipila ka mga pulis gikan sa Provincial Public Safety Company.

Kompiyansa si Davide nga wala ray kaguliyang nga mahitabo sa provincial jail kay anaa man ang presensiya sa kapulisan.

Ang CPDRC dunay kinatibukang 2.933 ka mga piniriso, diin 60% niini o 1,705 inmates ang nag-atubang og drug cases.

Atol sab sa Oplan Tokhang sa kapulisan sayo ning semanaha, natumbok nga dunay 500 ka mga piniriso nga gihualgway nga highvalued prisoners tungod sa giingong pagpadayon sa operasyon sa drugas sulod sa bilangguan.