500 ka tawo miapil sa kampanya batok drugas sa Talisay

DUL-AN sa 500 ka mga tawo ang misalmot sa gilusad nga Mamamayan Ayaw sa Anomaliya, Mamamayan Ayaw sa Ilegal na Droga Program kun MASA MASID sa Department of Interior and Local Government (DILG) ug gipahigayon sa dakbayan sa Talisay.

Kagahapon gilusad ang programa nga gipangulohan sa Talisay Police Station apan gitambongan kini sa tanang representante sa unang distrito sa Sugbo sama sa lungsod sa Minglanilla, Naga City, San Fernando, Carcar City ug lungsod sa Sibonga nga gipahigayon sa Lagtang gym.

Kadaghanan sa mga mitambong mao ang mga barangay tanod sa 22 ka barangay sa Talisay ug mga silingan siyudad ug lungsod, diin si Bise Mayor Alan Bucao maoy nitambong habig sa kagamhanan sa Talisay.

Ang MASA-MASID usa ka programa sa kumonidad nga nagdasig sa mga sibilyang, tanod ug uban pa nga makigbatok sa tanang matang sa kriminalidad, ilegal nga drugas ug kurapsyon.

Lakip sa maong programa sa MASA MASID diin ang mga volunteers pahibaw-on sa ilang responbilidad ug kinahanglan nga aktibo sa pagpakig-alayon sa kapulisan sa ilang tagsatagsa ka dapit.

Si Supt. Aileen Recla miingon nga dako kinig matabang ngadto sa kapulisan tungod kay sila man gayod ang anaa sa ilang barangay ug nahibawo sila kon si kinsa kadtong mga badlungon.

“Ang ilang tabaho, first, mo- provide og information gathering sa ilang barangay ang magmonitor sa status sa surrenderee whether nibalik na sad sa illegal drugs,” matod ni Recla.