Papa namusil kay gihikap ang kamot sa anak

MABINI, Bohol - Patay ang usa ka 61 anyos nga ulitawo human kini gipusil sa usa ka amahan dihang giingon nga gigunitan sa napatay ang kamot sa anak sa suspetsadong amahan nga 13 anyos niadtong miaging Dominggo sa hapon didto sa Purok Lower Kulo, Poblacion 1, lungsod sa Mabini.

Giila ang suspek nga si Cirilo Anzano, 40, kinsa lumulopyo sa nahisgutang barangay samtang ang napatay nga 61 anyos giila nga si Aurelio Bago nga residente sa samang lugar.

Sa pasiunang pakisusi sa kapulisan, nasayaran nga parehong gituhoan ang suspek ug ang namatay sa biktima nga ubos sa ilimnong makahubog.

Giingon nga kalit ug pugos nga nigunit ang biktima ngadto sa kamot sa 13 anyos nga dalagita nga anak sa suspek.

Nasuko ang amahan sa kalit nga gibuhat sa biktima ngadto sa iyang anak hinungdan nga dali kini nga mikuha sa usa ka armas ug gipusil ang biktima sa makaduha ka higayon.

Apan ang usa lamang ka bala ang miigo ngadto sa biktima diin milagbas kini sa dughan nga maoy hinungdan sa dali nga kamatayon niini.

Gieksamin ni Dr. Ivy Padernal, Rural Health Unit Officer sa lungsod sa Mabini, ang patayng lawas sa ni Bago ug nipadayag nga ang samad pinusilan maoy hinungdan sa pagkaimpas sa kinabuhi sa biktima.

Pakyas ang kapulisan sa pagpangita sa armas nga gigamit sa suspek ug padayon pa kini sa ilang imbestigasyon.