Eagles Vantage mibukas og buhatan
ORMOC CITY — Usa ka ilado nga Cebu-based community type cooperative ang nagbukas og sangang buhatan sa Ormoc City sa miaging adlaw.
Kini mao ang Eagles Vantage Multi-purpose Cooperative diin ang ilang branch sa Ormoc naa sa Villar building sa Barangay Alegria.
Gipasigarbo sa mga kadagkoan niini ang ilang mga maayong tanyag ngadto sa mga taga Ormoc ingon man sa mga silingang lungsod nga buot magpamiyembro.
Matod ni assistant operations head Rhoderick Hugo, naghatag sila og uno porsiyento nga monthly interest sa savings deposit sa mga miyembro, duna usab silay pito ka real estate subdivision projects sa Cebu ug looking sites sa Ormoc. Duna usab silay loan program, hospital reimbursement assistance ug uban pa.
Matod naman ni Alex Mabaquiao, senior executive officer, plano usab nila nga mag-abli og laing sangang buhatan sa General Santos, Bohol, Surigao, Dumaguete hangtud modaghan kini lukop nasud.
Dugang ni Mabaquiao, sayun ra ang pagpamiyembro.
“Very simple, 1 ka valid I.D (government issued), proof of billing, dapat 18 years old pataas pero pwede sab 18 years old paubos, but kinahanglan og parents consent,” matod ni Mabaquiao.
Ang kooperatiba nagsugod niadtong tuig 2012 nga gipangulohan sa mga pastor ug mga negusyante.
Sa pagsugod duna lang silay 24 ka miyembro apan sa Cebu City pa lang, duna na silay 3,000 ka miyembro.