Bangka nga demotor iparehistro: Marina
TAGBILARAN CITY – Mopahigayon ang Maritime Industry Authority (MARINA) og mobile registration alang sa mga di rehistradong mga bangkang de motor karong umaabot Oktubre 12 hangtod 14 sa Barangay Danao, lungsod sa Panglao.
Atol sa Kapihan sa PIA, giaghat ni Norma Enriquez sa Marina-Bohol nga mga tag-iya og bangka nga gigamit alang sa island-hopping lakip na sa dolphin watching sa pagparehistro sa ilang mga sakyanan sa dagat aron mahimong legal ang ilang operasyon.
Gidasig usab ni Enriquez ang mga local government units ilabi na sa lungsod sa Panglao sa pagtabang sa pagpakatap niining kasayoran aron maparehistro na ang mga di pa rehistradong mga bangka sa ilang lugar.
Gihingusgan karon sa Philippine Coast Guard (PCG) ang pagdakop sa mga di rehistradong bangkang de motor human sa nahitabong aksidente sa Panglao diin usa ka turista ang namatay tungod kay naigo kini sa speedboat.
Nanawagan si PCG Tagbilaran Station Commander Benjie Quinisio sa publiko nga di mosakay sa mga kulurom nga mga bangkang de motor alang sa ilang kaluwasan.
Matud pa nga ang mga tag-iyaha usab sa mga bangkang de motor kinahanglang mokuha og insurance alang sa ilang mga pasahero sa di pa tugotang mo- operate.