Mga Vietnam nars nanakop og ubod
MGA nars nga anaa sa hospital nga naigo sa baha nanakop og mga ubod nga naglangoy sa pasilyo sa building.
Ang video nagpakita sa unsay nahitabo dihang ang Trung Vuong Hospital nga nahimutang sa Ho Chi Minh City, Vietnam, naigo sa baha nunot sa miagi nga bagyo.
Ang makasaysayon nga baha diin mosobra sa 204 millimeters nga uwan ang miigo sud sa duha ka oras, nga niresulta gibahaan ang karsada ug aduna pay water leak nga gikataho sa Bitexco Financial Tower, nga maoy labing taas nga building sa labing dako nga siyudad sa nasod.
Ang mga nars sa hospiltal nahatagan og labing lahi nga misyon sa naasoyng insidente, matod sa Thanh Nien News nga gikutlo sa Mirror News.
Human ilang nadakpan ang isda, ang mga nars nibutang niini sa plastic aron malimpyo ang ilang ward.
Ang average nga uwan alang sa Ho Chi Minh anaa ra sa 50 ngadto sa 100 millimeters atol sa grabe kaayo nga uwan.
Gikataho nga ang mananap nga gidakop sa mga nars gitawag nga “Asian swamp eel” ug di na kini bago alang sa mga mag-uuma nga ilang makuha panahon sa tinguwan.
Ang drainage system sa dakbayan maoy gitinguha sa taas na nga panahon nga ayuhon diin ang kagamhanan nagplano nga mogasto og $945 milyones karong buwana alang sa flood control ug sewage management.
Adunay mga dam nga buhaton sa 7.8 kilometros nga Saigon River ug daghan pang buhaton niini aron di na nila masinati ang baha, matod sa taho sa Talk Vietnam.