Sebastian dili katuohan

DAGHAN ang gibati og kahinam sa dihang gipadayag ni Jaybee Sebastian, pinaagi sa iyang abogado, nga andam siyang moyagyag sa tanan niyang nahibaw-an kalabot sa grabing pagkatap sa ilegal nga drugas sulod sa New Bilibid Prison sa Muntinlupa.

Apan matod pa ni Atty. Eduardo Arriba nga buhaton kini sa iyang kliyente kon si Presidente Rodrigo Duterte ang iyang ikaatubang.

Gipasalig ni Arriba nga walay bugti nga pangayuon si Sebastian baylo sa iyang pagsulti sa tanan ug gusto lang kini nga makatabang sa presidente.

Bilib sab ta aning Sebuastian kay sa tanang mga opisyal sa nasod nga mahimo niyang katug-anan sa tanan, ang presidente pa gyud ang iyang gipili? Kon seryuso siya nga motabang nganong ang pinakataas pa man nga tawo ang gusto niyang sumbungan?

Sa laing punto, kon atong tugotan nga boluntaryong motug-an o moluwat og testimonya si Sebastian, tinuod gyud kaha ang iyang gipanulti?

Dili kaha moluwat siya og mga pamahayag og pahimuslan lang niya ang kahigayonan nga maduot ang mga tawo nga iyang gikalagotan sulod sa NBP?

Sa laktod nga pagkasulti, si Sebastian dili katuhoan nga testigo tungod kay gawas nga leader siya sa mga kriminal, nganong karon man lang ni siya miboluntaryo nga daw sa naapiki na siya sa sitwasyon?

Sa niaging semana, giimbitar siya ni Justice Secretary Vitaliano Aguirre nga motestigo sa kongreso aron patug-anon kon giunsa nila pagpadagan ang gidiling drugas sulod sa Bilibid Prison.

Apan nagdumili kini ug mitanyag hinuon nga andam siyang moyagyag sa mga anomaliya sa pagsuplay sa mga pagkaon sulod sa maong prisohan, butang nga wa tubayi ni Aguirre.

Unya karon siya na pud ang manghangyo nga motug-an na sa tanan kalabot sa drugas? Lisod tuhoan.