Way kinutubang utang
HANGTOD karon nagbalikpa gihapon og tanyag nako ang lain-laing mga bangko para mokuha sa ilang Credit Cards (CC) apan bisan pa man sa lain-laing makatintal nga promo, wala ko magpadala ug padayong naggamit sa akong naandang Debit Card (DC).
Akong higala nga si Dolly nangutana ug nagpatudlo kung gi-unsa nako pagbahig ang akong binuwang kita labi na kay duna koy kaluha nga gipatungha sa kolehiyo ug wala koy pares nga makatambayayong unta nako pagpamayad sa tanang obligasyon gikan sa renta sa balay, tuition fees, bayad sa kuryente ug tubig ug inadlawadlaw nga pamiliti ug gasto sa pagkaon.
Ako siyang gisultihan sa akong mga kaugalingong pama-agi kung gi unsa nako paglahutay pagpamayad ug paghinay-hinay pagdispatsar ang akong mga utang.
Lahi sa uban ang akong ginabuhat kay imbis akong tigumon ang tanang subra human mabayre ang mga obligasyon kada pitsa kinse ug 30 sa buwan, ako man hinuong unahan pagtipig daan ang 10% sa akong kita para himuong tinigom. Ang mga subra mao nay akong bahin-bahinon pagbayad sa tanan.
Mas sayon para nako og mas makabarato sa pamaliton kung bayran og cash kaysa utangon pina-agi sa credit card kay sayod kita nga kini dunay patong nga interest.
Hugot nga pagdisiplina sa kaugalingong pag-gasto ang numero unong bansay-bansayon para makapundo og insakto. Kung duna kay ma ibgan nga butang, huwata una sulod sa usa ka buwan unya pangutan-a pagbalik imong kaugalingon kung nagkinahanglan ka pa ba ini? Likaye ang pagdali og pamalit sa mga makatintal ug maanindot nga palaliton labi na kung kini dili nimo kinahanglan. Pag-atang kung dunay SALE para dunay diskwento.
Mas makabarato sab ka kung mogamit og cash inig pangumpra sa mga merkado kaysa mga dagkong groceries gamit ang credit card kay gawas nga barato ug lab-as ang imong mapalit nga mga utanon, karne ug isda maka hangyo ka pa sa presyo. Ang ubang mga ginagmay nga mga tindahan manghatag pa gayod og pakapin. Paninguhaa nga ang imong tiningob nga kompra maigo sulod sa usa ka semana.
Ilista ang tanang mga utang ug pagbuhat og kaugalingong schedule sa pagbayad ini. Unahon pagbayad ang mga ginagmay’ng utang para duna kay agi nga makita sa imong nabayran.
Hinay-hinayi ang pag gasto para sa kalingawan. Imbis mangaon sa restaurant o mahalong imnanan, tan-aw og sine, suroy suroy o adto sa gymn, lingawon na lang nimo imong kaugalingong sa pagtan-aw og DVD sa balay, pagpalit og espisyal nga maluto o exercise sa kaugalingong tugkaran.
Sa katapusan, paninguhaa nga ang imong magasto sa tibuok buwan mas ubos kaysa imong kita aron dili ka maputos sa utang ug maupaw sa pagpangita ug pangbayad.