Gisuwayan og lugos

Dear Noy Kulas,

Wa ko magtuo nga mabuhat sa usa ka tawo nga imong giisip nga pamilya, apan makahimo diay pagtraydor. Bitin in short. Tawga lang ko og Melay, 35, way trabaho pero dunay gamay nga negusyo.

Suod mi ni Fred kay classmate mi sukad sa elementary. Maora na siya og akong brother kay bisan minyo na mi ug dunay tagsa ka pamilya, mag- bonding gihapon mi. Di magselos ang among tagsa ka partner kay nakahibawo sila kon unsa mi sukad sa bata pa ka suod kay kining among mga partner high school pa mga uyab na namo.

Usa ka higayon ana, wa diri ang akong bana ug mga anak kay nanglarga ug ako ra sa balay kuyog ang among helper. Magsuroyan ni si Fred sa amoa bisan unsa nga adlaw basta duna siyay time. Ambot unsang pagkaunsaa, gihagad ko niyag inom kay nagdala siya og red wine.

Kompyansa ra lagi ko, gainom ming duha. Pagkataud- taud, nalipong ko ug gibati og grabe nga kaduka nga di nako ma- explain kon ngano. Mao na lay akong nabantayan nga iya na kong gigakos ug ni- kiss nako sa lips. Sa akong kakugang, medyo naulian ko, ug ako siyang gitukmod ug gisikaran og kusog.

Nauwaw tingali siya, nilakaw nga way tingogtingog ug sukad adto, Noy, wa na siya mosuroy sa balay. Sakto kaha to akong gibuhat? Wa kaha ko alimungawi lang? Nakonsensya ko sa akong gibuhat. Pero sa pikas bahin, di ba to attempted rape iyang gihimo? MELAY Melay,

Wa tingali ka alimungawi. Tinuod ang imong nabantayan niadtong higayuna. Basin iya na tong giplano kay nakahibawo siya nga ikaw ra ang naa sa balay. Posibleng iyang gisagulan og substance ang imong giinom mao nga na- tipsy ka og kalit.

Di ka angay nga makonsensya kay husto ang imong gibuhat kay kon wa pa nimo to buhata, posibleng na rape ka. Maayo gani wa ka pa mawad-i sa panimuot kay basin kuwang ra ang dosage nga iyang gigamit. Wa kaayo makatalab nimo.

Huwata nga siya ang mangayog pasaylo nimo. Apan ayaw na pagkompyansa sa sunod. Ayaw na siya hatagi pa og laing kahigayunan. NOY KULAS