Milo run bonding time sab sa single mother ug anak
DUL-AN sa 18,000 ka mga runners ang nisalmot sa 40th Milo Marathon Cebu Leg na nagsugod atubangan sa Cebu Normal University ug nitapos sulod sa Cebu City Sports Center niadtong Dominggo. Usa sa liboan ka mga runner ang inahan ug anak na si Annie Penaroya Balaga ug Monsour John Balaga na sulod na sa pila ka tuig nahimo nang bonding time ang esport.
Si Annie, 47, nagpaalim pa sa iyang Achilles tendinitis injury apan nakapilde pa kini og batan-on na runners ug nisulod sa Top 5 sa women’s 10K category. Iyang gihuman ang lumba sulod sa 53 minutos ug 49 segundos. Si Monsour John, 25, nisuporta sa iyang mama ug niapil pud kini sa men’s 10K.
Matod pa ni Annie na sakit jud sa tiil kung modagan na adunay injury pero taas daw siya og pain tolerance. Sama daw sa kinabuhi ang esports kung imo jud na paningkamotan imo ra gyud mabuhat.
Si Annie, nagtrabaho sa sales and marketing sa Anthony Bernards Development Company, nagpakita sa kaisog sa usa ka babae dili lang sa running apil napud sa kinabuhi. Nag inusara niyang gipadako ang iyang bugtong na anak na si Monsour John human sila magbuwag sa iyang bana 23 na ka tuig ang nakalabay.
Dos anyos palang si Monsour John niadtong ilang pagkabuwag sa iyang bana na kanhi Overseas Filipino Worker (OFW). Grabe ang ilang pagkasuod sa iyang anak ug mas nisamot pa kini niadtong nagsugod silang duha og running pag 2012.
“Challenging jud kung ikaw ra usa ang mopadako sa imong anak. Pero strong man pud ko og personality maong nakaya ra nako. Pareha rana sa sport kung imo jud buhaton bisag unsa pa ang babag makaya ra jud,” matod ni Annie.
Usa ang running ang bonding time nila Monsour John ug Annie, ug gani kung moapil sila sa national finals ug lumba na gawas sa Cebu modiretso na silag bakasyon.
“Nindot na karon pareha mi og sport kay kung mangaon mi inig buntag mao jud among istoryahan. Magplano mi kung asa sad mi sunod moapil na lumba. Pareha rapud mi og circle of friend,” ingon ni Annie, kinsa nakahuman og 42K sa national finals pag 2015.
Si Monsour John usa ka kanhi varsity football player sa Don Bosco Technological Center (DBTC) niadtong elementary ug high school siya. Wala na siya mag varsity sa pageskewela na niyag Fine Arts sa University of San Carlos, ug ang running mao na iyang nahimong primary sport.
“Nagsugod ko running 2012 kay overweight ko 140 pounds ko. Niya ako pud giingnan si John na kuyogi ko sa ako dagan. Adto gasugod naming duha sa running magkuyog nami pirme,” ingon ni Annie, na karon 110 pounds nalang.
Si Monsour John modagan og 21K karong Oct. 23 sa Milo Marathon Cagayan de Oro Leg para mo suway og pa qualify sa unang higayon sa national finals na himuon karon Dec. 4 sa Iloilo City.
“Ako goal lang karon na maka qualify ko para national finals sa Milo Marathon ug maka finish sa 42k sa finals kay nasuya ko sa ako mama last year,” matod sa kanhi right winger sa DBTC, na bago lang naka recover sa iyang hamstring ug knee injury.
“Thankful kaayo ko sa support ni Mama nako ug naningkamot pud ko na ma proud siya nako sa ako mga gipang buhat,” gidugang ni Monsour John.
Si Annie naka 8th place pud sa women’s 21K last year, ug nihuman pud siya sa 42K as Clark, Pampanga. Naka 7th place pud siya sa 21K sa Bacolod Leg pag 2014. Sauna pangandoy lang niya ang makahuman sa taas na distance pero nakab-ot ra tungod sa iyang determinasyon.
“Ang ako nalang gusto ma achieve sa running ron kay makaapil unta mi og motherand-son tandem sa ako anak. Usually couples category raman gud ang sa run wala pa ang mother-and-son/daughter tandem,” matod ni Annie, kinsa miingon na iyang pagdagan karon usa sa paagi sa pag maintain sa iyang fitness.