Pacquiao adik-adik sab kaniadto?
GIANGKON ni Manny Pacquiao nga sa wala pa siya nahimong boxing world champion, nigamit siya og nagkadaiyang ginadiling mga druga dihang teenager pa siya.
Apan iyang gitino nga nagsuporta siya sa hugot nga kampanya ni Presidente Rodrigo “Digong” Duterte sa pagpakigbatok sa ginadiling druga nga miresulta sa kamatayon sa kapin sa 3,000 ka mga tawo, kadaghanan drug pushers ug users.
Ning iyang pag-angkon, nagtuo si Pacquiao nga dili ra maapektuhan ang ilang maayong relasyon ni Duterte.
“The president, he doesn’t know my experience with drugs,” matod ni Pacquiao, 37, kinsa usa na ka senador sa kasamtangan.
“He always gives a chance to people who want to be changed. I tried drugs... many kinds of drugs, all kinds of drugs.”
Gipasabot ni Pacquiao nga milanat sab og pipila ka mga tuig ang iyang paggamit og mga druga.
Alang sa Pambansang Kamao, gitugyanan siya sa Kahitas-an aron makatabang sa pagdisiplina sa katawhang Pilipino.
Nagkanayon si Pacquiao, kinsa lumad nga taga General Santos City, nga sa dihang nagsugod pa siya sa boksing, daghan og natabang si Duterte kaniya. Ang boksing maoy nahimong agianan ni Pacquiao aron hingpit nga makabiya sa paggamit og druga.
“He helped me a lot. He helped me with the promotion when I started in boxing. One of my fights held in Davao, he sponsored it,” asoy sa 8-time world champion.
“He helped with the promotion, financially as well.”