Don Bosco gitipi sa Baby Webmasters
ADUNA ra man tuod siya’y gitas-on nga 4’11” apan higanteng tahas ang gimugna ni Gelmart Umpad sa krusyal nga bahin aron agakon ang University of Cebu (UC) Baby Webmasters ngadto sa 7570 nga kadaugan batok sa Don Bosco Technological Center (DBTC) Greywolves sa ilang kulbahinam nga quarter-final knockout game sa Cebu Schools Athletic Foundation Inc. (CESAFI) basketball event sa Cebu Coliseum niadtong Huwebes sa gabii. Sa kadaugan, ang Baby Webmasters nakasulod sa round robin semi-finals kauban ang Cebu Eastern College ( CEC) Dragons, University of the Visayas (UV) Baby Green Lancers ug defending champions Sacred Heart SchoolAteneo de Cebu (SHS-AdC) Magis Eagles. Human sa sikit nga engkuwentro sa 1st half, ang Greywolves daw paingon nang modominar sa kombati dihang nakaposte sila og 46-34 nga labaw sa tungatungang bahin sa 3rd quarter sa pagpangulo nila ni Ken Gato, JB Damolo ug Juan Miguel De La Torre.
Sila si Jumike Casera, John Bryle Cuyos ug Luigi Gabisan nagkumboya aron dili malubong og taga liog ang Baby Webmasters taliwala sa bangis nga gipakita sa Greywolves.
Sa tungatungang bahin sa 4th quarter, ang Greywolves naglabaw na sab og 12 puntos, 67-55.
Human niini, makabungog nga 16-1 nga rally ang gimugna sa Baby Webmasters pinaagi sa panagkumboya nila ni Cuyos, Gabisan, Kyle Ordeniza ug ning higayuna, nitabang na si Umpad aron ilugon ang labaw, 71-68, sa nahabiling 1:03 minutos.
Ning maong dakong rally sa Baby Webmasters, grabe ang natampo sa paghasolhasol sa depensa ni Umpad nga nakapugos og sunodsunod nga turnovers alang sa Greywolves.
Gisuwayan og pukaw ni Gato ang taas nga pagkahinanok sa opensa Greywolves aron pahakan ang labaw sa Baby Webmasters, 70-71, sa nahabiling 47 segundos.
Apan human niini, ningbahar na sa hingpit ang opensa sa Greywolves ug wala na sila nakadugang og puntos.
Ang Webmasters nakadugang og puntos pinaagi sa freethrows nila ni Casera, Umpad ug Yannick Enriquez.
Bisan sa iyang kagamyon, nakabira sab og importanteng offensive rebound si Umpad sa himatyong segundos nga nakatabang aron maseguro sa Baby Webmasters ang kadaugan.
“Katong nagsige na mi og gukod, usa ra gyud ka rally ang akong gipangayo ug gusto nako nga molahos na gyud ni sa among kadaugan. Nagpasalamat ko nga nahitabo gyud,” matod ni Baby Webmasters coach Jover Samonte, kinsa nagtumbok sa ilang 16-1 nga rally sa 4th quarter.
Ang kadaugan gipamngulohan ni Cuyos pinaagi sa iyang 19 puntos, nidugang og 14 puntos si Casera, niamot og 12 puntos matag usa sila si Umpad ug Ordeniza samtang nihatag og 10 puntos si Gabisan.