SIAKON SA G#3

Duwa karon: 5:00 pm. - TNT vs. Meralco

ANG pagbuak sa panagtabla maoy senaryo nga masaksihan karong gabii sa panagsangka og balik sa TNT Katropa ug sa Meralco Bolts sa Game 3 sa nagpadayon nga PBA Governors Cup

semifinals round sa Araneta Coliseum. Human sa ilang kapildihan sa Game One niadtong Martes, ang Bolts mibangon og daw sa nagmangtas nga mibawos niadtong Huwebes ug mikulit sa 106-91 nga kadaugan nga maoy nagtabla ilang series, 1-1.

Ang beteranong si Jimmy Alapag maoy mipakita sa iyang kalantip sa kadaugan diin perpekto kining mipabuhagay sa iyang upat ka itsa sa three-point area aron giyahan ang mga locals sa Meralco pinaagi sa iyang 16 puntos nga may upat ka assists.

Aron paglikay sa peligrusong sitwasyon, ang Bolts sayo nga milusad og rally, 29-15, sa

first quarter ug giinat kini ngadto sa 24 puntos nga labaw, 76-52.

Ang import nga si Allen Durham mipabuhagay og 31 puntos, 21 ka rebounds duha ka

blocks samtang ang rookie nga si Chris Newsome maayo usab nga nakasuporta nga may 17 puntos, 10 ka rebounds ug lima ka assists.

Nakatimaho sa ilang kalisdanan, si coach Jong Uichico sa TNT daw sa sayo na kaayong

miisa sa bandera nga gani wala na niya pasudla ang iyang numero unong pambato nga si Jayson Castro sa kinatibuk-ang fourth quarter.

Apan karong gabii gipaabot nga ang hugot nga panag-engkuwentro human ang series mikuyos ngadto sa best-of-three na lang. Apan pagsakmit sa kadaugan sa Game 3 maoy maghatag sa mananaog og dako unyang bintaha sa Game 4. JBM