Nahagit si Tenorio sa PBA
DILI ikalimod nga usa si LA Tenorio sa mga nahimong bayani aron matambalan ang kahidlaw sa Brgy. Ginebra Gin Kings pinaagi sa paglangkat sa Philippine Basketball Association (PBA) Governor’s Cup title ning bag-uhay lang.
Sa iyang gipakita, angayan lang nga mapiling Finals MVP ang gitawag og “Lieutenant” o “Tenyente” niadtong higayuna diin ilang gipukan ang Meralco Bolts, 4-2, sa finals series.
Kini maoy ikaduhang titulo sa produkto sa Ateneo de Manila University (ADMU) Blue Eagles sa PBA. Una siyang nahimong kampiyon sa labing unang professional nga liga sa Asya niadtong 2010 ubos sa kampo sa Alaska Aces diin nahimo siyang co- Finals MVP kauban si Cyrus Bacguio.
Una niya natabangan ang Ginebra nga makaangkon pagbalik og titulo human sa dugayng panahon, si Tenorio nakaagi sab og mga pagsaway gikan sa mga sumosunod sa labing sikat nga
basketball team sa nasod. Gani, sa miaging duha ka mga tuig, adunay mga hugonhugon nga posibleng i- trade sa Ginebra ang 6- time All-Star. Mas nahimong kontrobersyal kining maong isyu gumikan sa mga post sa
social media nga “Trade LA Tenorio,” Niadtong mga higayuna, kanunay lang manamilit og sayo ang Gin Kings sa matag komperensiya.
Nagkanayon si Tenorio nga imbes mahugno siya sa mga pagsaway, gihangop kini niyang usa ka dakong hagit aron mas maningkamot pa ug matabangan ang Ginebra nga makalangkat pagbalik og korona.
“Things like that, we cannot control. May mga tao talagang will pull you down. For me, it’s a challenge. It’s a challenge for me. I don’t care kung ano yung sasabihin nila sa akin,” matod pa ni Tenorio sa interbyu sa www.rappler.com. “As long as yung team namin, we’re working hard, and nagtutulungan ka mi. Hindi naman nila alam kung ano yung ginagawa namin araw-araw eh. They’re just watching the game.”
Dihang natuman ang tinguha ni Tenorio nga maagak pagbalik ang Gin Kings ngadto sa kampiyunato, ningtidlom ang mga pagsaway ug pulos na pagdayeg ang iyang nadawat.
Ning puntoha, makonsiderar nga usa na si Tenorio sa mga malampusong basketbolista sa nasod. Alang kang Tenorio, naabot niya ang tumoy sa kalampusan gumikan sa iyang tumang paningkamot gikan pa sa iyang pagkabata.
Bata pa, nagduwa na
Si Tenorio natawo niadtong Hulyo 9, 1984 sa Nasugbu, Batangas. Ang iyang kompletong pangalan kay Lewis Alfred Tenorio. Nagsugod siya pagduwa og basketball sa edad nga sais anyos. Niadtong higayuna, wala’y nakakita sa potensyal ni Tenorio apan naningkamot siyang makaapil og basketball team dihang Grade 3 pa lang siya sa Don Bosco Makati.
Dihang grade six na si Tenorio, nakaduwa siya sa nationally-televised exhibition game atubangan sa PBA crowd ubos sa kampo sa Ateneo Grade School Small Basketeers Team. Napilde ang team ni Tenorio apan nikawat siya og dakong atensyon dihang nakamugna siya og 31 puntos sulod lang sa 21 ka mga minutos nga pagduwa.
Sa high school, nanimpalad si Tenorio sa Adamson University ubos sa paggiya ni coach Charlie Dy apan nabalhin ra sab dayon siya sa San Beda College diin nahashasan og maayo ang iyang abilidad.
Sa kolehiyo, nitapon si Tenorio sa Ateneo de Manila ug nakahimo dayon kini’g langas sa labing una niyang tuig sa UAAP niadtong 2001 kay naagak niya ang Blue Eagles sa finals. Hinuon, napilde ang Blue Eagles sa karibal niini nga De La Salle University (DLSU) Green Archers.
Pagkasunod tuig, naagak pagbalik ni Tenorio ang Blue Eagles sa UAAP Finals ug ning higayuna, nailog nila ang korona gikan sa Green Archers.
Natuboy na sab ni Tonorio sa finals ang Blue Eagles sa ikatulong sunodsunod nga higayon niadtong 2003 apan gipakyas sila sa Far Eastern University (FEU) Tamaraws.
Sulod sa lima ka mga tuig nagduwa si Tenorio sa Ateneo de Manila diin migraduwar siya og Bachelor of Arts degree niadtong 2006 nga iyang gikonsiderar nga mas labing importante.
PBA No.4 pick
Niadtong 2006, gidala ni Tenorio ang iyang talento sa PBA diin gipili siya sa San Miguel franchise isip No.4 overall pick. Ubos sa San Miguel franchise, nagduwa si Tenorio sa Magnolia diin
nag- average siya og 7.8 puntos, 4.6 assist, 3.6 rebounds ug 25.5 playing minutes. Sa usa ka surpresang kalambuan, gi- trade sa Magnolia si Tenorio kauban si Larry Fonacier sa Alaska Aces alang nila ni Mike Cortez ug Ken Bono.
Niadtong 2012, nabalhin si Tenorio sa Brgy. Ginebra pinaagi sa six-player blockbuster deal.
Gawas sa PBA, nakahimo sab og langas si Tenorio dihang nahimo siyang sakop sa Gilas Pilipinas 2.0.
Sa edad nga 32, taas-taas pa ang pagatahakon ni Tenorio sulod sa rectangle nga korte. Matod pa ni Ginebra coach Tim Cone, ang Governor’s Cup title maoy magsilbeng sinugdanan sa pagdominar puhon sa Gin Kings, natural ubos sa paggiya ni Tenorio.