15-anyos nahulga’g bato, patay

USA ka 15-anyos nga tinun-an sa grade 7 ang patay human nadat-ogan og bato niadtong Sabado sa buntag sa Sitio Kanluma, Barangay Bongon, lungsod sa Tabuelan.

Ang bata naila nga si Girbin Librero Montebon, kinsa wala na makakuha sa iyang bayad human sila nanguha og anapog sa iyang duha ka mga higala.

Tungod sa grabeng kadaot sa ulo niini ug nagkadaiyang parte sa iyang lawas hinungdan sa kamatayon sa bata.

Ang mga higala niini nga sila Jayboy Pepito Cole ug John Kyle Arellano Momo, parehong 13-anyos, wala maunsa sa maong insidente.

“Mao pa daw tong una niyang pag-apil og kubkob,” matod ni PO3 Gilbert Allego sa Tabuelan, Police.

Si Montebon mao ang ikatulo sa unom ka magsuon.

“Buotan daw tong bataa. Kon unsay sugoon, motuman gyod,” dugang ni Allego.

Base sa imbestigasyon, ang silingan sa bata nga si Marvin Oporto Tulod maoy nagsugo sa mga bata nga magkubkob og anapog.

Alas 11:30 sa buntag niadtong Sabado samtang nagkubkob ang mga bata, wala kini makabantay sa dako nga bato sa ilang ulohan.

Nitabang sila si Momo ug Cole sa pag-alsa sa bato nga niigo kang Montebon apan wala na kini naglihok.

Gidala sa Tuburan District Hospital ang biktima apan gideklarar nga dead- on-arrival.

Ang ginikanan ni Montebon nga sila si Sanito ug Vilma, nitaho sa insidente sa kapulisan, alas 4:00 na sa hapon ug walay plano nga mopasaka og kaso batok kang Tulod, matod ni Allego.

“Kon naa makitang sayop, naa gyoy filan og kaso,” dugang ni Allego kinsa nitataw nga gihatag na nila sa Children and Women’s Desk ang insidente.

Ubos sa Republic Act (RA) 9231 kun ang Anti-Child Labor Law, gidili ang pagpatrabaho sa menor hilabi na kadtong delikado nga trabaho. Protektado kini sa RA 7610 o Special Protection of Children against Abuse, Exploitation and Discrimination Act.