Mga buwak gikan sa bukiran sa Sugbo prayoridad sa Carbon

TAGAAN og prayoridad sa kagamhanan sa dakbayan ang mga mag-uuma gikan sa bukirang barangay sa dakbayan nga motinda sa ilang mga buwak sa Carbon Market ning nagkaduol ang kalagkalag.

Si Market Administrator Wine Miro nagkanayon nga mopahigayon sila og final meeting nga ilang gitawag og Opeartion Bulak karon nga langkuban sa Cebu City Police Office, Cebu City Transportation Office, Department of Public Services ug Barangay Kalubihan.

Ang Barangay Ermita, diin nahimutang ang labing dako nga merkado sa Sugbo, walay labot sa panagtagbo sanglit ang kapitan nga si Imok Rupinta dili maayo og relasyon ngadto ni Mayor Tomas Osmeña.

Si Miro nagkanayon nga sugod karong Oktubre 28 hangtod sa Nobiyembre 2 makatinda sa ilang mga buwak ang mga transient vendor, kinsa una rang gipahibawo sa market administrator apan balik sa normal sa Nobiyembre 3.

“Ang vendors gikan sa bukid maoy tagaan og priority nga makatinda,” matod ni Miro.

Ang sige og paninda dili nato tugotan makatinda kay ihatag sad nato sa uban,” matod ni Miro.

Ang mga vendor adto mo- display sa ilang mga tinda sa P. Lopez duol sa University of San Jose Recoletos, parte sa Freedom park, F. Calderon ug Labucay sulod sa upat ka adlaw nga gihatag sa City Government.

Si Miro nagkanayon nga bisan og wala nay klase ang mga unibersidad ug mga pampublikong eskwelahan makasinati gihapon og kahuot sa dagan sa trapiko gumikan sa presensiya sa mga vendor ug mga mamalitay og buwak.

Iyang giawhag ang adunay mga sakyanan nga moadto sa Carbon sa maong mga adlaw sa pag- park didto sa distansiya nga lugar aron dili makatampo sa problema ug iyang gihangyo kon mahimo sa dili pagdala og sakyanan.

Alerto ang kapulisan, market operation division, traffic enforcers, garbage collectors, barangay intelligence network ug mga volunteer aron pagsiguro sa malinawon ug luwas nga kasaulogan sa All Saints ug All Souls Day.