Wa hatagi og ESA gikwestyon ni Loot
GIKWESTYON ni Daanbantayan Mayor Vicente Loot ang palisiya sa gobiyerno nga di hatagan og apil og emergency shelter assistance (ESA) ang mga pamilya nga naa nanimuyo sa mga danger zone.
Ang mayor nipasabot sa kasamtangan way mga dokumento ang ilang lungsod nga nagdeklarar nga dunay mga coastline barangay nga giila isip danger zones.
“So what is the basis? Nobody among the previous administration or any agency from Daanbantayan has the expertise or the authority to declare an area as danger zone except MGB (Mines and Geosciences Bureau). And MGB did not issue any document,” pasabot ni Loot.
Matod niya padayon pa nga nihimo og pagtuon ang MGB bahin niini.
Siya nasubo nga daghang mga pamilya ang wa gi-qualify sa Department of Social Welfare and Development nga makadawat og ESA tungod kay giingon naa sila nagpuyo sa danger zone sama sa duol sa baybayon.
Apan duna usab mga pamilya nga naa sa susama nga sitwasyon apan gihatagan og apil, sumala ni Loot.
“Mao na karon ang gipangita namo, ang hustisya sa mga biktima sa Yolanda nga gitiwasan pa sa ESA. So continuing pa gihapon ang among adbokasiya ang paghatag og hustisya sa mga biktima sa Yolanda,” pamulong sa mayor.
Dul-an tulo ka tuig human gikuso-kuso sa bagyong Yolanda ang amihanang Sugbo diin usa sa nakaangkon og kadaot ang Daanbantayan.
Apan hangtod karon duna pay mga pamilya nga giingong wa pa makadawat og ESA.