Dili makamao nga manglimpyo silutan

MGA Talisaynon nga di makamao manglimpyo sa ilang palibot hinungdan nga motumaw ang sakit nga dengue silotan ug makamulta na.

Kini sa higayon nga maaprobahan na ang ordinansahon nga gitawag og Anti-Dengue Task Force aron ila pang mapahingusgan ang ilang kampanya batok sa dengue.

Si Konsehal Choy Aznar, chairman sa committee on health, niingon nga ang Talisay usa sa mga lugar nga adunay daghang mga lamok nga nagdala og dengue.

Gani sa labing uwahing record ang Talisay naa sa ikawalo nga dapit tibuok lalawigan nga adunay labing daghan og kaso sa dengue.

Matod ni Aznar nga sa maong ordinansa mao usab unya kini ang mohulma og balik sa dengue task force nga wa mapatuman niadtong miaging administrasyon.

Iyang gitumbok nga ang ordinansa di lang mag-awhag nga maglimpyo ang mga molupyo sa Talisay kon di apil na usab ang mga establisemento nga anaa sa-Talisay nagbase.

Samtang lakip usab unya sila sa silutan ang mga magpapatigayon nga mapakyas sa pagpanglimpyo sa ilang palibot.

Gani ila nausab nga giawhag ang tanang tunghaan sa Talisay nga ibalik ang four o’clock habit ug ang search and destroy operation.

Matud ni Aznar nga kun mapasar na ang ordinansa kinahanglan ang matag usa manglimpyo sa ilang palibot ug wagtangon kadtong mga dapit o mga pundo sa tubig nga maoy pundohan sa mga lamok nga nagdalag sakit sa dengue.

Ang anti-dengue task force unya maoy ilang tahasan sa pagsuroy sa mga kabarangayan aron maoy mopasabot sa mga tawo nganong malimpyo ug molista niadtong mga molupyo nga nagpasagad.

Una niini si Dr. Lino Alanzado, city health officer, nihangyo ni Mayor Eduardo Gullas nga mokuhag 12 ngadto sa 20 ka mga tawo aron maoy i-train alang sa pagpuhag sa mga lamok nga nagdalag dengue.

Sapagkakaron, ang Talisay nakatala na og 300 kapin ug kuwang nga kaso sa dengue ug aduna nay lima ka tawo ang namatay.