Utlanan tali sa mga barangay buot ipaklaro
BUOT sa konseho sa dakbayan sa Mandaue nga klaruhon unya ang mga utlanan sa matag barangay tungod aron di kini magkabikil kon adunay mga bag-ong negosyo o establisamento nga tukuron.
Si Konsehal Ernie Manatad, kinsa ex-officio nga kawani sa konseho nga maoy nirepresentar sa mga barangay, nagkanayon nga gikinanglan sulbaron sa kagamhanan sa dakbayan ang panaglalis sa mga utlanan sa mga barangay.
Sa 27 ka mga barangay sa Mandaue, upat ka mga panangbangi sa utlanan ang nasuta ning mantalaan.
Kini mao ang ultanan tali sa Canduman ug Pagsabungan; Pagsabungan, Tabok ug Basak; Subangdaku ug Tipolo; ug Centro ug Ibabao.
Ang isyu kabahin sa pagsulbad sa mga utlanan sa barangay nahisgutan human sa kompirmasyon ni Amadeo Seno nga maoy consultant sa mayor sa barangay settlement ug kontrata sa gobyerno atol sa sisyon sa konseho sa dsakbayan niadtong Huwebes sa hapon.
Sumala pa ni Manatad nga maoy kapitan sa Brgy. Subangdaku nga adunay bikil ilabi na kon mga dagko na nga establismento ang mokuha ug permit ug mga clearance gikan sa barangay.
Iyang gihimo nga ehemplo ang kaso sa Chong Hua Hospital diin ang hurisdikyon niini anaa sa Subangdaku apan didto gi-credit ang real property tax niini sa city treasurer’s office sa Brgy. Tipolo.
Paambit usab ni Manatad nga sagad sa mga establisamento sa North Reclamation Area di na mokuha og permit ug clearance gikan sa iyang barangay.
“If they will get clearances and permits, it will add to our revenues and income,” matod ni Manatad.
Si Seno nga usa ka manlalaban ug kanhi bise mayor nisugyot sa konseho nga mohimo unya kini ug adhoc committee nga maoy morelbar sa bikil kalabot sa mga utlanan sa mga barangay.
Sumala pa ni Seno nga aduna na silay gihimo nga technical nga description sa mga utlanan sa barangay apan anaa lang kini sa papel.
“We need to relocate the exact delineation of each baranagay and it’s technical,” matrod ni Seno niingon.
Nangayo usab siya ug pagtugot sa konseho sa pagkuha ug pribado nga geodetic engineer nga maoy mopinalisar sa utlanan sa 27 ka barangay sa dakbayan.
“I know we will be encountering some problems. It will take one term for us to finish all of this,” dugang niya.
Sa kasamtangan, bugtong tumdanan lang sa pipila ka mga barangay sa dakbayan ang tax map nga maoy proweba sa utlanan.