Dumpsite sa Umapad angay na sirad-an: Cabrido
GITATAW nga angayang ipasirado alang sa rehabilitasyon ang dumpsite sa Brgy. Umapad, dakbayan sa Mandaue.
Kini maoy giingon ni Atty. Benjamin Cabrido, consultant sa environmental protection sa dakbayan sa Mandaue atol sa iyang kompirmasyon isip consultant ug pagtambong sa sesyon sa konseho sa dakbayan sa Mandaue sayo ning semanaha.
Atol sa sesyon, gipahibalo ni Cabrido ang konseho nga giandam na sa Solid Waste Management Board ang upat ka tuig nga plano sa pagpasirado sa maong dumpsite alang sa rehabilitasyon niini.
Ang maong tahas matod pa subay sa balaod nga ang maong dumpsite himuong sanitary landfill.
Ang Umapad dumpsite anaa mahumutang sa walang bahin sa Marcelo Fernan Bridge ug ang bahin niini nagatubang sa Mactan Channel.
“We cannot implement the plan if we will not close the Umapad,” si Cabrido niingon. Samtang padayon ang rehabilitasyon sa maong dumpsite, gisugyot ni Carbrido ang pag-abli sa dakbayan ug alternatibong landfill didto sa bukirang bahin sa dakbayan nga mao ang Brgy. Casili.
Apan ang tinguha ni Cabrido nagkinahanglan pa ug pagtando sa konseho sa dakbayan sa di pa magsugod ang implementasyon niini.
Buot usab ni Bise Mayor Carlo Fortuna nga maoy presiding officer sa konseho nga ang maong tahas ipaagi una ug konsultasyon sa publiko nga himuon sa Casili.
“There are major undertaking that needs to be study. We don’t want ending up defending especially in Casili, just like the time of then mayor Ouano where there are opposition led by a city councilor,” ni Fortuna ngadto ni Cabrido.
Nisaad hinuon si Cabrido nnga mohatag siya ug kopya sa maong pagtuon lakip na ang plano sa temporaryong landfill nga himuon sa 5 ka ektaryang luna Casili ngadto sa konseho.