35 ka tinun-an motungha sa Japan
MOKABAT 35 ka mga Sugboanong tinun-an ang mahatagan og kahigayonan nga makaadto sa Japan alang sa Saitama-Cebu Comprehensive Human Resource Monosuki Project.
Kini human sa gipirmahan ni Cebu Governor Hilario Davide III ug Saitama Prefecture Governor Kiyoshi Ueda ang memorandum of understanding (MOU) ang “enhance cooperation in the field of human resource development” sa duha ka nasod.
Sa kasabutan, makat-on ang mga Hapon nga tinun-an og Ingles sa Sugbo samtang mopaubos sa training ang mga Sugboanon sa Japan.
“After this MOU we would like to expand our relationship, our exchanges between Saitama and Cebu Province,” nagkanayon si Ueda.
Lakip sa mga tunghaan nga posibleng malakip sa training sa Japan ang mga tinun-an sa University of San Jose-Recoletos, University of San Carlos ug Cebu Technological University.
Ang proyekto ubos kini sa sponsorship sa Japan International Cooperation Agency (JICA) diin libre ang paglarga ug pag-istar sa mga tinun-an didto ingon man makadawat kini og allowance atol sa training.
Nagkauyon usab sa MOU sila si Davide ug Ueda nga magtinabangay kini sa pagpahugot pa sa human resource development initiatives ug pagpalambo pa sa teacher/student exchange sa pagtuon pinaagi sa kasabutan sa mga unibersidad.
Lakip usab sa nasabutan ang mutual exchange sa mga tinun-an sa unibersidad ug pribado nga kompaniya pinaagi sa internship.