Asawa, kabit nagbinirahay
(Napatik sa Superbalita Davao, Oktubre 23, 2016)
MISANGKO sa presinto sa kapulisan ang dinumogay sa usa ka asawa ug giingong kabit sa iyang bana alas 7:00 sa gabii, niadtong Biyernes.
Nagpa- blotter sa San Pedro Police Station ang legal wife nga si Alice, 41, singer, nagpuyo sa Landmark, Barangay Sasa, dakbayan sa Davao kay nakahiagom kinig mga bun-og sa nawong ug sa iyang kalawasan tungod sa kaisog sa giingong kabit nga si alyas Ruby.
Si Alice giingong paggawas na sa balay kalingawan sa dan Ponciano apan kalit siyang gidasmagan ug gidumog ni Ruby.
Nagdinumogay ang duha sa sidewalk apan niabot sila sa tunga sa dan sa Ponciano hinungdan nga gidali silag uwang sa mga tawo nga naa sa hitabo.
Sumala ni Alice nga naa na silay bangi human dunay mga higayon nga nagpakita kini og di maayong taras kaniya pinaagi sa pagkompronta sa personal ug pagpadala og mensahe pinaagi sa text.
Giingon nga dugay nang nasayran ni Alice nga dunay tago nga relasyon ang iyang bana ngadto kang Ruby nga
maoy sagad hinungdan sa ilang panaglalis.
Dugang niini, miulbo ang kasuko ni Ruby human siya gikomprontase sa bana ni Alice ugaling mag-away na ang mag-asawa tungod sa giingong tago nila nga relasyon.
Gipatala na lang sa legal wife ang hitabo aron ipatawag sa barangay si Ruby aron didto sila mahusay.