Bata, 8, gihikap ni lolo

(Napatik sa Superbalita CDO, Oktubre 22, 2016)

USA ka 62 anyos nga lolo ang gibalhog karon sa prisohan human giingong nangmolestiya sa 8-anyos nga bata sa Barangay Lapasan, dakbayan sa Cagayan de Oro.

Ang lolo nga giilang si Bengie (bansagon gitago), buwag na sa asawa ug nagpuyo sa San Juan, sa samang barangay ning dakbayan.

Sa imbestigasyon sa Womens and Children Protection Desk sa Police Station 3 sa Agora nasuta nga ang biktima giingong gihaylo niini og P20 pesos ug gidala sa tulda nga gipuy-an niini ug didto gimolestiya pinaagi sa paghikaphikap sa pribadong parte sa lawas niini.

Apan kining tanan hugot nga gihimakak sa suspek ug miingon nga di kini niya mabuhat tungod kay gaalagad siya sa Diyos.

Giingong sayod siya nga kun himuon kini niya masunog sa impiyerno iyang kalag.

Matod niini nga suod lamang siya sa mga bata tungod kay iya kining gitudloan sa mga pulong sa bibliya ug iyang pakan-on tungod sa iyang kaluoy.

Gibutyag usab niini nga posibleng naalaan lamang siya tungod kay sa unang pagtudlo sa biktima gibutyag sa otso anyos nga di kini ang nimolestiya kaniya apan gikakurat niya nga nausab ug siya na maoy gitudlo.

Ang amahan sa bata masukanon kaayo ug hugot nga miingon nga mataral sa hukmanan ang mibuhat niini sa iyang anak.