Maguwang giunay og dunggab sa manghod

MABINI, Bohol - Samdan nga gidala sa tambalanan ang usa ka ulitawo human kini giunay pagdunggab sa iyang maguwang nga lalake gamit ang kutsilyo nga adunay gitas-on nga walo ka pulgadas dihang nagkasumpaki kini samtang nag-inom pasado 6:30 sa gabii didto sa Purok Nangka, Poblacion 1, lungsod sa Mabini.

Giila ang biktima nga si Carlos Genon, 37, ulitawo, mag-uuma ug residente sa nahisgutang lugar.

Samtang ang gitumbok nga suspek mao ang maguwang sa biktima nga giila nga si Angelo Genon, 43, minyo, mag-uuma ug lumolupyo sa samang barangay.

Sa pasiunang pakisusi sa kapulisan, nasayran nga ang managsuon nag-inom kauban sa ilang duha ka paryente nga sila si Crisanto Panuncial ug Goerge Balud didto sa giamumang tawid nga gipanag-iya sa usa ka Della.

Pipila ka minutos ang milabay samtang naglami ang inom sa grupo ug dihang nagkalawom na ang panaghisgot kalit lang nga nagkainitay ang magsuon.

Tungod sa presensya sa ilimnon, nasamot ang panagbingkil sa magsuon ug mipagawas og kutsilyo ang maguwang gikan sa iyang hawakan dayong gisuwayan pagdunggab ang iyang manghod, apan nakalikay kini.

Milakaw ang manghod palayo sa iyang maguwang aron sa paglikay sa gubot tali sa iyang maguwang apan gisundan kini sa maguwang ug kalit nga gibuno ang manghod og bukong sa lubi sa makaduhang higayon, mga 50 metros ang gilay-on gikan sa lugar nga ilang gitagayan.

Dihang nagkatinubagay ang magsuon, gidunggab pag-usab sa maguwang ang manghod ug nasamdan ang dughan dayon natumba ang manghod nga nabulit sa kaugalingong dugo.

Gitabang sa usa ka paryente ang biktima ug gidala ngadto sa Rural Health Unit sa Mabini aron matambalan ug human gipadala kini ngadto sa Candijay Community Hospital, sa lungsod sa Candijay aron sa dugang nga pag-eksamin sa biktima.

Gisikop sa kapulisan ang suspek didto sa ilang panimalay.

Boluntaryo usab nga gitahan sa kapikas sa suspek ang gituhoang gigamit nga kutsilyo sa pagdunggab sa biktima.

Gidala usab ang suspek sa tambalanan aron sa pag-eksamin niini samtang giandam sa kapulisan ang mga dokumento alang sa ipasaka nga kaso batok sa suspek.