Msgr. Uy gitudlo nga obispo sa Tagbilaran

TAGBILARAN CITY - Gitudlo ni Pope Francis si Monsignor Alberto Uy sa Diocese sa Talibon isip bag-ong obispo sa Diocese sa Tagbilaran niadtong Oktubre 13.

Si Uy ang ika-12 nga obispo gikan sa lalawigan sa Bohol ug ikapito nga obispo sa Bohol sukad namugna ang diocese, 75 na ka tuig ang nakalabay.

Hulipan niya ang 77 anyos nga si Bishop Leonardo Medroso kansang resignasyon gidawat sa Santo Papa.

Isip Obispo, si Medroso unang mialagad sa Diocese of Borongan sud sa 19 ka tuig hangtud nga gibalhin siya sa Diocese sa Tagbilaran niadtong 2006.

Si Uy kasamtangang Episcopal Vicar sa Diocese sa Talibon ug pastor usab sa St. Michael the Archangel Parish sa lungsod sa Jagna.

Ang bag-ong natudlong obispo nga lumad nga taga lungsod sa Ubay ning lalawigan, misaulog sa iyang ika-50 ka adlawng natawhan niadtong Oktubre 18.

Si Uy nikuha sa iyang philosophical studies sa Immaculate Heart of Mary Seminary sa dakbayan sa Tagbilaran ug theology, una sa St. John Mary Vianney Theological Seminary sa siyudad sa Cagayan de Oro City diin natapos niya iyang Bachelor in Sacred Theology degree ug Masters in Pastoral Ministry.

Nakumpleto niya iyang licentiate sa Sacred Theology sa- Loyola School of Theology sa siyudad sa Quezon.