Bag-ong hagit, opurtunidad
KAGAHAPON, ang Superbalita Cebu nisaulog sa ika-22 nga anibersaryo nga puno sa paglaum uban sa inyong suporta, bumabasa ug advertisers.
Karon maoy unang adlaw sa iyang pagsulod sa ika-23 nga tuig sa pag-alagad sa publiko pinaagi sa paghatod sa labing lab-as ug komprehensibong taho nga walay gipihig, lakip sa paghatag og kalingawan sa masa.
Apan dili sayon ang mosunod nga katuigan tungod sa dakong kausaban sa industriya sa komunikasyon dala sa kapaspas sa kabag-ohan dala sa teknolohiya sa internet.
Sa laktod nga pagkasulti, ang tradisyonal nga mantalaan naapektohan sa pagsulpot sa social media nga bisan kinsa na lang makahimo ang makahatod og mga kasayoran ngadto sa walay kinutubang populasyon sa netizens.
Ang dakong isyu karon sa kadaghan sa sites o blogs, matuod ba ang taho? Patas ug kasaligan ba ang tinubdan?
Mao kini ang dakong hagit sa matuod nga mga mamahayag taliwala sa nahisgotang kabag-ohan, ang karaang elemento sa insaktong komunikasyon nagpabilin ug mas gikinahanglan karon sama sa balanse o patas, accuracy o pag- verify sa matag kasayoran, lakip sa sakto nga gambalay sa pagsuwat o grammar kanunay tamdan.
Busa, mas gikinahanglan ang tradisyonal nga mantalaan nga aktibo usab sa social media aron pagpatunhay sa tinuod nga pamahayag ug paggiya sa netizens nga dili mahisalaag.
Ang pagtumaw sa social media giisip nga dakong opurtunidad sa Superbalita Cebu nga aktibong sa maong gambalay karon ug sa umaabot pang katuigan.