Biyahe para kalagkalag
ANG management sa South ug North Bus Terminal nagsugod na pagpangandam alang sa subling pagbaha sa daghang pasahero nunot sa kasaulogan sa kalagkalag.
Si Joey Herrera, tagdumala sa Cebu South Bus Terminal nipakita diri nako sa iyang Plan A ug Plan B nga gusto niyang ipatuman sugod karong Sabado, Oktubre 29. Iyang napanglantawan nga sa maong petsa modagsa na ang daghang pasahero nga mamauli alang sa kalagkalag sunod semana. Matod niya ang Plan A mao ni ang naandan nga paagi nga ilang gisagop sa mga ordinaryo nga adlaw. Samtang ang Plan B mao ang mga pamaagi nga sagupon sa mga adlaw nga dunay dakong okasyon o kalihukan sama sa kalagkalag, Pasko, Piyesta Señor ug Semana Santa.
Ubos sa maong plano dakong kausaban ang ipatuman sama sa pag-usab sa entrance sa mga pasahero. Kadtong mobihaye padung sa Toledo, Pinamungajan ug Balamban adto na mosud sa entrance kilid sa buhatan sa Land Transportation Office.
Samtang kadtong mobiyahe padung sa South adto sa naandan nga entrance sa wala nga bahin pabor anang namaligya og pagkaon. Hinuon sumala ni Herrera ang mga senior citizen, PWD ug mga mabdos ug kadtong mga inahan nga may gikugos nga masuso mahimo ra nga mosud sa mga entrance nga ilang gusto. Apil na ilang mga alalay apan limitado ra sa usa ka buok. Didto sa sud hatagan gihapon sila og pribilihiyo nga unang makasakay. Sumala ni Herrera ang unang napulo ka senior, PWD, mabdos ug kadtong nagkugos og masuso, kuyog gihapon sa ilang alalay tugutan nga unang makasakay sa matag bus nga mobiyahe. Limitado ra gyud sa usa ka alalay. Ang subra kinahanglan nga molinya ug posibling magkabuwag ang ilang biyahe.
Pasabot nga kon si lolo dunay kuyog nga duha ka dagkong apo ang usa kauban si lolo di na kinahanglan nga molinya. Apan ang usa, molinya aron makasakay. Ingon ana sab ang mahitabo alang sa mga PWD, mabdos ug mga inahan nga may gikugos nga masuso. Sa North Bus Terminal, ingon sab niini ang mahitabo sumala sa ilang manager nga si Jun Jumaoas. Matod ni Jun mao na ni ang naandan nga polisiya nga ilang gipatuman kaniadto pa.
TRAPIK
Bisan unsa ka komprehensibo ang pagpangandam sa duha ka terminal di gihapon ni paigo pagsiguro nga madali ang paghakot sa nagsinardinas nga pasahero. Kini tungod sa dako ug lapad nga problema sa trapiko nga sagubangon sa mga bus. Unsaon man pag-abot og sayo sa mga bus sa terminal kon masangit sa grabing trapik.
Sa biyahe sa south ang mga dapit nga kanunayng masangu ang mga bus mao ang trapik sa Bulacao, Tabunok ug Minglanila. Ang sa norte ang trapik sa Cosolacion ug Mandaue maoy dakong babag nga makaabot og sayo sa ilang destinasyon ug makabalik og sayo padung sa terminal. Kini nga kalbaryo matag adlaw nga mahiaguman sa atong mga bus ug mini bus sa dugay nang panahon.